Resultat annual SRG SSR 2023: in resultat operativ equilibrà

La SRG SSR guarda danovamain enavos sin in onn plain eveniments e sfidas. Il 2023 è stà marcà da las elecziuns federalas, la surpigliada da la CS tras l'UBS, catastrofas da natira naziunalas che han chaschunà devastaziuns en blers lieus en Svizra, da la guerra che cuntinuescha en l'Ucraina e l'escalaziun en il conflict dal Proxim Orient. Las redacziuns da tut las unitads d'interpresa da la SRG SSR han er il 2023 purschì rapportaziuns contextualisadas d'auta qualitad. Cun lur formats d'emissiun giaudan ellas vinavant la fidanza dal public e stattan a la testa dals ratings da la qualitad. 

Utilisaziun stabila

Malgrà ch'i n'ha dà naginas occurrenzas da sport grondas l'onn 2023 e malgrà ch'ils programs da radio e televisiun vegnan consumads en general pli pauc a moda lineara e la concurrenza internaziunala massiva, è la quota da participaziun al martgà dals emetturs da la SRG SSR restada stabila il 2023. 83 pertschient da la populaziun en Svizra ch'è activa en la rait e pli veglia che 15 onns consumeschan almain ina giada l'emna ina purschida da la SRG SSR en la televisiun, en il radio, sin paginas-web, sur apps u sin plattafurmas da las medias socialas. Er la derasaziun da las purschidas online è restada stabila. La plattafurma da streaming Play Suisse ha pudì augmentar il dumber d'abunent:as sin passa in milliun.

Resultat annual equilibrà 

Malgrà las entradas commerzialas vinavant regressivas, ha la SRG SSR pudì concluder l'onn 2023 cun in resultat operativ da 2,2 milliuns francs. D'engraziar è quest resultat ad ina planisaziun da finanzas precauta e prospectiva ed ad ina gestiun precauta dals meds finanzials disponibels. 

Il 2022 ha la SRG SSR pajà ina reserva da las contribuziuns dal patrun da 35 milluns francs a la cassa da pensiun per sustegnair ses grad da cuvrida. Ils martgads da finanzas èn entant sa sviluppads a moda positiva uschia ch'il grad da cuvrida da la cassa da pensiun ha puspè pudì vegnir augmentà a passa 100 pertschient e la cassa ha pudì realisar in retgav finanzial cun ils meds supplementars. La rectificaziun da la valur da 35 milliuns francs è perquai puspè vegnida schliada. Sch'ins includa quest effect betg operativ munta il resultat d'interpresa a 37,2 milliuns francs. 

Damain retgavs da reclama e sponsoring 

La SRG SSR ha stuì supportar il 2023 ina regressiun dals retgavs da reclama e sponsorng da 28,6 milliuns francs. La sminuziun dals retgavs da servetschs da 4,4 milliuns francs e dals retgavs da manaschi da 2,9 milliuns francs èn da declerar cun eveniments da l'onn precedent sco la producziun da las cursas da skis alpinas als gieus olimpics a Beijing ed in gudogn immobigliar singular.

Dapli expensas per segirezza digitala e protecziun da datas

Ils custs da persunal èn cun stgars 53 pertschient da las expensas da manaschi era vinavant cun distanza il pli aut post da custs dal quint da gudogn e perdita. Il svilup dals custs da persunal è d'attribuir als custs da paja ch'èn s'augmentads, tras la chareschia ed in augment dal dumber da persunal en spezial per la segirezza digitala e la protecziun da datas e tras internalisaziuns. 

Las expensas da program e da producziun ch'èn sa sbassadas per 8,9 milliuns francs èn da declerar en emprima lingia cun il fatg ch'i n'ha dà naginas occurrenzas da sport grondas sco gieus olimpics u campiunadis mundials u europeics da ballape che han chaschunà custs per dretgs da sport. Cuntrari als dretgs da sport èn las expensas per producziuns ficziunalas s'augmentadas.

Investiziuns, amortisaziuns, chapital ester

Las investiziuns materialas muntan a 95,6 milliuns francs ed èn cun quai 2,7 milliuns francs pli bassas che l'onn precedent. Las amortisaziuns èn cun 67,2 milliuns francs levamain pli autas che l'onn precedent. 

Il chapital ester tschainsibel è vegnì reducì L'onn da gestiun passà per 50 milliuns francs tras restituziuns e munta uss anc a 300 milliuns francs cun ina summa da la bilantscha da 1128,1 milliuns francs. 

Projects d'immobiglias

Dapi l'avertura avant passa in onn e mez è la Radio Hall sin il Campus Leutschenbach da SRF a Turitg s'etablida sco lieu principal da radio SRF. Il contract da dretg da construcziun per l'immobiglia a la Brunnenhofstrasse a Turitg han ins visà e la chasa da scola per il stgalim superiur cun dievers supplementars planisada da la citad, vegn realisada actualmain. 

Il project per la nova sedia da RTS sin il Campus da la Scola politecnica federala Losanna (EPFL) a Losanna-Ecublens (inauguraziun il 2025) per remplazzar ils studios a La Sallaz e la concentraziun dals studios da RSI a Comano al nord da Lugano (avertura probablamain il 2027), inclus la vendita da l'edifizi a Besso a la vischnanca da Lugano, s'avanzan sco planisà.

Il rapport da gestiun detaglià da la SRG SSR vegn publitgà la fin d'avrigl suenter che la radunanza da delegadas e delegads ha approvà el.

Quint da gudogne e perdita 2023