Nus creain plivalur

La strategia d'interpresa e da purschida 2019–2020 da la SSR è vegnida surlavurada fundamentalmain il 2018. Da nov è ella dividida en trais champs principals. La singularitad da las purschidas sco era la tenuta da l'interpresa èn en il focus.

Purschida

Nus vulain adattar e meglierar constantamain la purschida. Tranter auter stat en il center il public giuven. La SSR vul porscher uschè bleras producziuns sco pussaivel che represchentan la realitad svizra. Uschia ans differenziain nus dad auters purschiders. Natiralmain resta l'infurmaziun independenta, critica e d'ina fitg auta qualitad vinavant ina pitga impurtanta da nossa purschida.

Nus accentuain nossa particularitad, nossa plivalur


Il mund medial digitalisà ha en mira d'ademplir uschè bain sco pussaivel ils basegns individuals – gruppaziuns socialas pli grondas d'antruras sa dividan en nundumbraivels fragments. La SSR lavura cunter questa tendenza cun intermediar eveniments cuminaivels e cun crear ina societad collectiva ed in'identitad en il mund individualisà. Grazia a cuntegns schurnalistics d'ina fitg auta qualitad e purschidas equivalentas en tut las quatter linguas naziunalas impedin nus che las cuminanzas linguisticas sa separian. Cun purschidas da cultura e da furmaziun interregiunalas faschain nus avanzar il barat da savida tranter las parts dal pajais, promovain la chapientscha vicendaivla e rinforzain uschia l'identitad naziunala.

En quel connex èn l'independenza e la diversitad d'opiniuns valurs centralas. Pertge che medias independentas èn la basa per ina discussiun politica democratica e differenziada. En in temp che tant chasas da medias privatas sco era publicas vegnan pli e pli sut squitsch è in provediment medial da basa da gronda impurtanza. Uschia mussan studis che pajais cun ferms emetturs publics tendeschan a damain extremissem ed han meglier sut controlla la corrupziun. Grazia a la finanziaziun cun taxas garantida da plirs onns n'è la SSR betg dependenta d'interess politics ed economics e po realisar purschidas, da las qualas autras chasas da medias avessan forsa respect.

La legitimaziun da la SSR è sia distinguibladad. Era pervi da quai ans concentrain nus en la purschida da novitads online cunzunt sin audio e video. Nus purschain qua cuntegns attractivs ed actuals che correspundan a noss standards da qualitad schurnalistics e publicistics, ils quals furman ensemen cun la clera orientaziun audiovisuala ina purschida cumplementara en la cuntrada mediala svizra.

En tschintg onns vulain nus cuntanscher in equiliber tranter la purschida digitala ed il broadcast


Las medias vegnan nizzegiadas pli e pli online e mobile. Per restar relevant per noss public er en futur e per porscher als umans, tuttina nua ch'els èn, cuntegns interessants e d'ina fitg auta qualitad, vul la SSR rinforzar ed amplifitgar sias purschidas digitalas. Tranter auter stat en il center il public giuven. Quel na cuntanschain nus betg mo cun render accessibels noss cuntegns tradiziunals en il web. Perquai sviluppain nus constantamain novas furmas narrativas, novs formats e novas furmas da distribuziun che correspundan a las spetgas dals giuvens e da las persunas che consumeschan en viadi medias online.

Nus vulain integrar tut las generaziuns, en spezial ils giuvens. Els creschan si en in mund digitalisà cumplainamain ed han adina pli savens ina biografia da migraziun. Els s'orienteschan tenor novas plattafurmas da communicaziun, tranter auter tenor las medias socialas. Perquai sviluppain nus nossas purschidas ensemen cun umans giuvens, e betg mo per els. Uschia pudain nus porscher cuntegns che represchentan il mund da noss public giuven a moda autentica.

La midada digitala sin il martgà medial ha in effect direct era sin il consum medial. Quel è pli e pli adattà a basegns individuals e dirigì d'algoritmus. Utilisadras ed utilisaders survegnan dapli da quai ch'als interessa – però era damain dal rest. Sco chasa da medias che duai contribuir a la furmaziun libra da l'opiniun essan nus obligads da lavurar cunter quests princips.

La SSR na sa e na vul betg sa serrar envers las novas pussaivladads. Era nus vulain meglierar cuntinuadamain nossa purschida e cuntanscher meglier noss public en l'internet. Nus facilitain l'access a noss cuntegns via tut ils chanals e sviluppain là access al program persunalisads, sche las utilisadras ed ils utilisaders giavischan quai e sche nus pudain propi porscher ina plivalur. Nus respectain però adina la sfera privata da las utilisadras e dals utilisaders – en accord cun nossa incumbensa, en servetsch da la societad. Uschia purschain nus a nossas utilisadras ed a noss utilisaders in'offerta persunalisada e respectain la sfera privata. Nus essan conscients da la responsabladad sociala e na creain nagins agens munds isolads.

Nus dain dapli paisa a la «swissness» en nossa purschida


Nossas atgnas producziuns èn products svizzers da qualitad en quatter linguas. Il public da la SSR appreziescha particularmain questas atgnas producziuns resp. questas emissiuns cun in connex svizzer. Quai mussa ina cumparaziun exemplarica da formats svizzers cun emissiuns cumparegliablas da l'exteriur ch'ins ha pudì guardar il 2018 sin SRF 1: il crimi dal mardi «Der Alte», ina producziun tudestga, ha cuntanschì ina derasaziun media da 410 000 aspectaturas ed aspectaturs, entant ch'il crimi svizzer «Der Bestatter» han guardà en media 775 000 persunas.

Però: atgnas producziuns èn charas, perquai finanziescha strusch ina chasa da medias commerziala ina tala purschida. Grazia a l'independenza economica segirada cun la finanziaziun cun taxas da plirs onns po la SSR investir en cuntegns indigens. E quai betg mo areguard la producziun, mabain er areguard la concepziun dal program. Il 2018 èn stads producids sez 90 pertschient dal program durant il temp d'emissiun principal. En il sectur da divertiment investesch'ins 86 pertschient dals meds en purschidas producidas sez e mo 14 pertschient en purschidas producidas da terzs. Nus divertin ils umans cun cuntegns svizzers nunconfundibels. Uschia purschain nus ad els dapli varietad e cunzunt dapli «swissness» sin la paletta da las purschidas medialas. Nus essan la tribuna per la Svizra.

Quai che reguarda la producziun da musica mantegnain nus il nivel actual da producziuns svizras, amplifitgain però il barat interregiunal. Uschia faschain nus la punt tranter las regiuns linguisticas ed avischinain noss public en tut las parts dal pajas a la creaziun culturala svizra. Nus stain per l'ierta culturala da la Svizra cun la mantegnair e la promover e cun gidar a la concepir activamain.

Relaziun

La SSR vul demussar e declerar meglier la contribuziun ch'ella presta a favur da la coesiun e da la varietad culturala e politica svizra. Perquai tschertga ella il barat equivalent e vul esser averta per autras ideas, novs partenadis, il dialog public, però era per critica. Cunquai ch'il service public gioga ina rolla centrala en l'entir ecosistem medial da la Svizra, è impurtanta era la collavuraziun cun autras medias ed instituziuns svizras sco universitads e scolas autas.

Nossa purschida da program cuntanscha e commova tut las gruppas en mira


Sch'ils emetturs da la SSR rapportan d'eveniments, d'istorgias e da destins, guardan e taidlan milliuns: passa 2,2 milliuns aspectaturas ed aspectaturs en tut la Svizra han persequità cun tensiun ils 17 da zercladur 2018 sin ils emetturs da la SSR co che la squadra naziunala svizra da ballape ha cuntanschì al campiunadi mundial da ballape en Russia il resultat dad 1:1 cunter la «seleçao» da Brasilia. 1,2 milliuns persunas èn daventadas perditga, cura che Beat Feuz ha gudagnà ils 13 da schaner 2018 la cursa rapida al Lauberhorn cun il numer da partenza 1. La producziun da la SSR «Gotthard» ha attratg il december 2016 passa 1,3 milliuns aspectaturas ed aspectaturs davant la televisiun. E stgars in milliun persunas èn s'infurmadas l'avantmezdi dals 5 da december 2018 sin in dals emetturs da la SSR davart ils resultats da las elecziuns dal Cussegl federal.

Igl è impurtant che muments cuminaivels fan punts en la Svizra plurilingua cun sias differentas culturas. Perquai reunin nus la societad svizra – en occasiun d'occurrenzas grondas en ils secturs cultura, sport e politica. E quai uschè savens sco pussaivel en directa.

I tutga tar l'incumbensa e tar l'autodefiniziun da la SSR da cuntanscher tut ils umans en Svizra. Perquai pussibilitain nus a tuts d'acceder a noss programs, cunzunt er a persunas cun impediments dals senns. Gia oz suttitulain nus var 30 000 uras program. Quai è la mesadad dal temp d'emissiun. Fin il 2022 schlargiain nus questa purschida sin 45 000 uras resp. 80 pertschient. En cumparegliaziun cun las 420 uras cun cuntegns audiodescrits dad oz vegnan messas a disposiziun 900 uras. Quai che reguarda ils cuntegns en lingua da segns han ins la finamira da cuntanscher 1000 uras – en confrunt cun las 440 uras dad oz. Grazia a las novas tecnologias digitalas sa midan er ils servetschs d'access. Cun il HbbTV interactiv pudain nus porscher ad umans cun impediments dals senns anc in meglier access a nossas purschidas.

L'incumbensa d'integraziun da la SSR è actuala pli che mai: var in quart da la populaziun svizra na posseda betg in pass svizzer. Perquai na dastga la prestaziun d'integraziun da la SSR betg sa restrenscher sin ina simpla represchentaziun da las diversas culturas en Svizra. Noss programs duain gidar a s'emprender d'enconuscher ed uschia meglierar la chapientscha in per l'auter – e tematisar las bellas varts sco era quellas main bellas. Nus faschain quai sapientivamain entaifer las emissiuns existentas e betg en il rom d'emissiuns spezialas.

Nus rinforzain la relaziun averta e transparenta cun la societad svizra


La SSR sco chasa da medias publica stat en servetsch da la societad. La societad è nossa incumbensadra. Ella ha il dretg da pretender pled e fatg ed ella ha l'obligaziun dad adina puspè metter en dumonda criticamain l'incumbensa. Perquai vulain nus ans barattar meglier cun noss public davart tge che nus prestain ed a tge che nus contribuin. Uschia creain nus dapli approximitad cun la societad svizra. Grazia a questa avertadad dain nus als umans en Svizra la pussaivladad d'entrar cun nus en in dialog direct e persunal e da crear ensemen cun nus il futur da la SSR. Perquai mettain nus a disposiziun differents chanals, saja quai via nossa purtadra, via emissiuns specificas e formats da barat sco per exempel «Hallo SRF», via las medias socialas u il barat persunal en occasiun d'occurrenzas grondas, festas popularas ed open airs.

Per che eveniments cuminaivels na giajan betg en emblidanza, contribuin nus a la memoria acustica ed audiovisuala da noss pajais. Pertge ch'ils archivs audiovisuals da la SSR èn in bun cultural che creescha identitad: els envidan Svizras e Svizzers a l'exteriur da tgirar lur ragischs. Els permettan a migrantas ed a migrants invistas en il passà dal nov dachasa. Els pussibiliteschan a mintgina ed a mintgin da nus d'ordinar l'atgna biografia en l'istorgia contemporana. Ed els encurascheschan il public da reflectar en il decurs dal temp adina danovamain tendenzas politicas e culturalas, eveniments e l'agir da persunas. Noss archivs na cuntegnan betg main ch'in milliun uras emissiuns – producziuns da radio dapi 85 onns, producziuns da televisiun dapi 60 onns.

Nus contribuin al sistem ecologic da medias svizzer


La midada digitala augmenta la concurrenza tranter ils purschiders privats e las chasas da medias publicas. L'idea che las chasas da medias publicas sajan responsablas a moda directa u indirecta per las difficultads economicas da medias privatas è fitg derasada. Quai n'è betg uschia, sco che demussan numerusas retschertgas internaziunalas: purschiders privats han era da sbatter cun problems economics sin martgads senza chasas da medias publicas. Perquai essan nus da l'opiniun ch'igl è oz uschè impurtant sco anc mai da concepir cuminaivlamain la plazza da medias svizra e da la rinforzar visavi la concurrenza internaziunala.

Ina collavuraziun intensivada da las medias privatas e publicas ha avantatgs per omaduas varts: tecnologias digitalas pretendan grondas investiziuns. Nossa avertadad per cooperar sbassa ils custs d'infrastructura per tut ils partenaris. Ina collavuraziun porscha damai er avantatgs economics. E la finala dattan partenadis era novs impuls schurnalistics. Perquai sviluppain nus ina collavuraziun raschunaivla cun tut ils acturs en la cuntrada mediala privata svizra.

L'innovaziun è l'essenza ed il motor da mintga chasa da medias. Perquai intensivain nus la collavuraziun cun universitads e scolas autas e contribuin a la transfurmaziun digitala da la societad. Ils experts èn numnadamain perencletgs ch'igl è in'incumbensa centrala da las medias d'observar la digitalisaziun e da la metter en dumonda criticamain. Il futurolog svizzer dr. Joël Luc Cachelin pretenda: «[Las medias] duessan promover l'autoreflexiun e la finala promover l'autodeterminaziun da las consumentas e dals consuments». La SSR po e sto giugar ina rolla impurtanta en questa debatta.

Resursas

Las midadas en la cuntrada mediala d'ina vart e la digitalisaziun da l'autra vart signifitgan era sfidas internas per la SSR. Pervi da la sminuziun da las entradas da reclama sco era pervi dal plafonament da las taxas è l'interpresa en in ambient economic pli difficil. Per crear il spazi d'agir necessari per ses svilup sto la SSR daventar pli agila, pli innovativa e pli effizienta – tant quai che reguarda la cultura da manaschi sco era quai che reguarda ils process e l'organisaziun.

La cultura mediala svizra sa transfurma d'in cuntin – e quai fitg svelt. Per tegnair pass cun las cundiziuns che sa midan ston las interpresas s'adattar. Perquai simplifitgain nus l'organisaziun sin tut ils nivels e promovain in management flexibel ed agil. Questa nova cultura da manar garantescha nossa cuntinuitad en ina cuntrada mediala che sa mida e fa avanzar la transfurmaziun da l'interpresa.

Il public svizzer attesta in'auta credibladad e professiunalitad sco er in bun equiliber a nossa purschida. Per satisfar a questa pretaisa er en il futur essan nus dependents da persunas qualifitgadas e bain scoladas. Nus vulain esser ina buna patruna per quests talents e promovain perquai la furmaziun supplementara da nossas collavuraturas e da noss collavuraturs, la successiun interna e la tschertga da talents sin tut ils nivels. Uschia garantin nus er en l'avegnir a noss public la qualitad la pli auta da nossas purschidas, pudain porscher a tut las generaziuns cuntegns da lur munds e purschain ad ellas in barat equivalent.

In punct central da l'optimaziun cuntinuada da noss programs è il public giuven. En quel connex sviluppain nus novas furmas narrativas, novs formats e novas furmas da distribuziun. Nus faschain quai ensemen cun umans giuvens, e betg mo per els. Perquai ans concentrain nus sin talents giuvens ed ans stentain dad esser ina patruna attractiva era per ils «digital natives». Uschia promovain nus tranter auter la nova generaziun da schurnalistas e schurnalists.

Il vast spectrum da noss programs da radio e televisiun reflectescha la Svizra plurilingua e multiculturala. Però era la SSR sezza represchenta linguisticamain e culturalmain la Svizra. 46 pertschient da nossas collavuraturas e da noss collavuraturs discurran tudestg (svizzer), 32 pertschient franzos, var 19 pertschient talian e 3 pertschient rumantsch. Ultra da las quatter linguas naziunalas èn represchentadas 18 ulteriuras linguas. En tut lavuran tar la SSR umans da 39 naziunalitads differentas. Cun ina cumpart da dunnas da 43 pertschient è la relaziun tranter las schlattainas en la SSR relativamain equilibrada. Nus dain gronda paisa a questa diversitad.

La SSR ha l'incumbensa da proveder tut la populaziun da la Svizra cun ina purschida da televisiun, radio ed online attractiva e variada. La creaziun da la purschida è la «raison d'être» da la SSR.

L'infrastructura, il support e la tecnica servan damai a la purschida. Nus vulain esser anc pli effizients sin tut ils secturs, cunzunt quai che reguarda ils custs d'infrastructura, d'administraziun e da tecnica. Nus analisain senza tabus ed a moda cumplessiva ed approfundada noss process e nossas metodas da producziun – e quai cun la clera perspectiva da sbassar ils custs. Uschia garantin nus d'accumplir l'incumbensa che la populaziun svizra ans ha surdà e d'investir uschè blers meds sco pussaivel en las purschidas.

En in temp che tant chasas da medias privatas sco era publicas vegnan pli e pli sut squitsch è in provediment medial da basa da gronda impurtanza. Per garantir nossa independenza impundain nus ils meds publics, per ils quals nus essan responsabels, cun premura ed a moda transparenta. Finanzas equilibradas furman numnadamain il fundament per l'ulteriur svilup.

Actualmain derivan trais quarts da las entradas da la SSR da las taxas da recepziun e stgars in quart da retgavs commerzials u d'auters gudogns sco per exempel da la vendita d'emissiuns ad auters emetturs da radio e televisiun. Grazia a la finanziaziun per gronda part cun taxas porscha la SSR a ses public cuntegns independents ed equilibrads en tut las quatter regiuns linguisticas. Las autras entradas generadas cun vender l'inventar da reclamas attractiv pussibiliteschan a la SSR d'investir ulteriurs meds en ils programs e d'offrir la purschida da program variada per las taxas actualas.

Il service public medial privilegià tras la finanziaziun cun taxas è adina puspè en il center da discussiuns politicas. Quellas na vegnan betg mo manadas en Svizra, mabain era gia dapi daditg a l'exteriur. Sco chasa da medias publica essan nus pertutgads directamain da quellas discussiuns e contribuin perquai activamain a la debatta davart il svilup dal model dal service public. Nus ans barattain permanentamain cun purschiders da service public d'auters pajais europeics e profitain da lur experientschas. Questas experientschas pudain nus duvrar per la debatta en Svizra.