Incumbensa

La SSR è in'uniun privata gestiunada tenor il dretg d'ina societad anonima che maina in'interpresa da medias. Nus ademplin in'incumbensa sociala a basa da la Constituziun, da la lescha e da la concessiun. Per far quai retschavain nus daners da las entradas da las taxas da radio e televisiun.

Ils mussavias per nossa lavur èn la Lescha federala davart radio e televisiun (LRTV) ed – a moda anc in zic pli detagliada – l'ordinaziun correspundenta e la concessiun dal Cussegl federal. Quels instruments defineschan nossas incumbensas. 

Tranter auter:

  • purschidas davart tscherts aspects en il program (la libra furmaziun da l'opiniun, la solidaritad tranter las parts dal pajais, la cultura svizra, la furmaziun, l'integraziun ed il divertiment),
  • offertas d'ina dimensiun cumparegliabla per las trais grondas regiuns linguisticas, ina purschida adattada era per la Svizra rumantscha, in'offerta online per Svizras e Svizzers a l'exteriur
  • la diffusiun en differentas modas (per exempel UUC, DAB+, DVB-T),
  • ina purschida d'internet tenor las prescripziuns (per exempel ina restricziun da contribuziuns en furma da text senza in connex cun las emissiuns da radio e televisiun),
  • ina structura organisatorica tenor las prescripziuns (per exempel la cumposiziun dal cussegl d'administraziun),
  • la collavuraziun cun tschertas branschas (film, musica, archivs, etc.).

Nus ans differenziain da purschiders commerzials era pervi da las spetgas qualitativas ed eticas spezialas envers noss programs.

La Confederaziun ans prescriva las activitads principalas, l'organisaziun e la finanziaziun, e l'Uffizi federal da communicaziun surveglia nossa lavur. Entaifer quel rom essan nus autonoms. La Constituziun federala garantescha nossa independenza ed impedescha ch'insatgi intervegnia en nossa lavur redacziunala.

Concessiun

La concessiun precisescha l'incumbensa che nossa purschida schurnalistica e publicistica ademplescha.

  • mintgamai trais programs per la regiun linguistica tudestga, franzosa e taliana
  • in program da radio rumantsch
  • mintgamai in program modifitgà per la regiun linguistica tudestga e franzosa (in program modifitgà surpiglia il caracter ed ils cuntegns dal program da basa correspundent, sa distingua però tras ses agen stil da musica)
  • in program da giuvenils per la Svizra tudestga
  • mintgamai in program da musica en ils secturs da classica, jazz e pop
  • in program d'infurmaziun tudestg.
  • mintgamai dus programs per la regiun linguistica tudestga, franzosa e taliana en qualitad da HDTV
  • emissiuns per la regiun linguistica rumantscha
  • in program da repetiziun tudestg
  • ina purschida en lingua franzosa cun infurmaziuns ed indicaziuns davart il program che vegnan actualisadas permanentamain via l'internet
  • emissiuns transmessas via l'internet davart eveniments politics, economics, culturals e sportivs da muntada linguistic-regiunala u naziunala
  • cuntegns online che na sa refereschan betg ad in'emissiun sco contribuziuns da text en las spartas novitads, sport e fatgs regiunals/locals (max. 1000 segns per contribuziun)
  • nfurmaziuns cumplementaras e contextualas davart emissiuns
  • infurmaziuns davart savida da basa che sa refereschan ad emissiuns instructivas
  • forums dal public u gieus colliads cun emissiuns
  • in servetsch online pluriling per l'exteriur (Swissinfo)
  • in servetsch online per il public talian che viva datiers dal cunfin svizzer (tvsvizzera.it)

La concessiun prescriva ultra da quai che la SSR contribuescha cun ses programs e sias ulteriuras purschidas publicisticas al suandant:

  • il public duai pudair furmar libramain sia opiniun grazia ad in'infurmaziun cumplessiva, multifara ed objectiva, surtut davart connexs politics, economics e socials
  • ils programs duain promover il svilup cultural e rinforzar las valurs culturalas dal pajais, gidar a sviluppar la cultura svizra resguardond surtut la litteratura, la musica e la cinematografia svizra
  • ils programs duain furmar il public, surtut cun emetter regularmain emissiuns cun in cuntegn instructiv
  • ils programs duain divertir il public.