Incumbensa

La SSR è in'uniun privata gestiunada tenor il dretg d'ina societad anonima che maina in'interpresa da medias. Nus ademplin in'incumbensa sociala a basa da la Constituziun, da la lescha e da la concessiun. Per far quai retschavain nus daners da las entradas da las taxas da radio e televisiun.

Ils mussavias per nossa lavur èn la Lescha federala davart radio e televisiun (LRTV) ed – a moda anc in zic pli detagliada – l'ordinaziun correspundenta e la concessiun dal Cussegl federal. Quels instruments defineschan nossas incumbensas. 

Tranter auter:

  • purschidas davart tscherts aspects en il program (la libra furmaziun da l'opiniun, la solidaritad tranter las parts dal pajais, la cultura svizra, la furmaziun, l'integraziun ed il divertiment),
  • offertas d'ina dimensiun cumparegliabla per las trais grondas regiuns linguisticas, ina purschida adattada era per la Svizra rumantscha, in'offerta online per Svizras e Svizzers a l'exteriur
  • la diffusiun en differentas modas (per exempel UUC, DAB+),
  • ina purschida d'internet tenor las prescripziuns (per exempel ina restricziun da contribuziuns en furma da text senza in connex cun las emissiuns da radio e televisiun),
  • ina structura organisatorica tenor las prescripziuns (per exempel la cumposiziun dal cussegl d'administraziun),
  • la collavuraziun cun tschertas branschas (film, musica, archivs, etc.).

Nus ans differenziain da purschiders commerzials era pervi da las spetgas qualitativas ed eticas spezialas envers noss programs.

La Confederaziun ans prescriva las activitads principalas, l'organisaziun e la finanziaziun, e l'Uffizi federal da communicaziun surveglia nossa lavur. Entaifer quel rom essan nus autonoms. La Constituziun federala garantescha nossa independenza ed impedescha ch'insatgi intervegnia en nossa lavur redacziunala.

Concessiun

La concessiun precisescha l'incumbensa che nossa purschida schurnalistica e publicistica sto ademplir. Ella

  • fixescha princips e valurs da basa (obligaziun al bainstar public, acceptanza, qualitad, dialog cun il public);
  • definescha incumbensas interdisciplinaras en ils secturs innovaziun, barat cultural, purschidas per giuvnas gruppas en mira, umans cun biografia da migraziun ed umans cun impediments dals senns;
  • concretisescha la purschida publicistica, cunzunt en ils secturs infurmaziun, cultura, furmaziun, divertiment e sport;
  • fa prescripziuns areguard la producziun e la derasaziun dals programs al radio, en la televisiun ed en l'internet sco er areguard las purschidas online. Ultra da quai fa ella prescripziuns areguard l'obligaziun da rapportar da la SSR ed areguard l'organisaziun e la collavuraziun cun autras medias, auters organisaturs ed autras branschas.

Al radio porscha la SSR:

  • mintgamai trais programs per la regiun linguistica tudestga, franzosa e taliana
    Radio SRF 1, Radio SRF zwei, Radio SRF 3, La Première, Espace 2, Couleur 3, Rete Uno, Rete Due, Rete Tre
  • in program rumantsch
    Radio Rumantsch
  • in program da giuventetgna per la Svizra tudestga
    SRF Radio Virus
  • in program d'infurmaziun tudestg
    SRF 4 News
  • mintgamai in program per la regiun linguistica tudestga e franzosa che dat blera plazza a la cultura da musica populara
    Radio SRF Musikwelle, Option Musique
  • per tut las regiuns linguisticas mintgamai in program da musica per classica, jazz e pop cun ina cumpart da musica svizra dad almain 50 pertschient
    Radio Swiss Classic, Radio Swiss Jazz

En la televisiun porscha la SSR:

  • mintgamai dus programs per la regiun linguistica tudestga, franzosa e taliana en qualitad da HDTV
    SRF 1, SRF zwei, RTS Un, RTS Deux, RSI LA 1, RSI LA 2
  • emissiuns rumantschas
    sin SRF 1, SRF Info, RTS Un, RSI LA 1, RSI LA 2
  • in program da repetiziun tudestg
    SRF Info
  • en tut las regiuns linguisticas in program da televisiun via internet cun infurmaziuns ed avis da program actualisads currentamain e senza reclama e sponsoring
    SRF Play, RTS Play, RSI Play, RTR Play, SWI Play

Tar l'ulteriura purschida publicistica tutgan:

  • purschidas online cun accent sin cuntegns audio ed audiovisuals
    p.ex. srf.ch, rts.ch, rsi.ch, rtr.ch, swi.ch, nouvo.ch, apps e medias socialas
  • teletext
    Il teletext porscha infurmaziuns curtas plurilinguas sin ils emetturs da SRF, RTS e RSI. El è disponibel en la televisiun, en l'internet u via app.
  • HbbTV (Hybrid broadcast broadband TV)
    HbbTV ubain Smart TV è ina tecnologia che collia la televisiun digitala cun l'internet. Sumegliant sco il teletext porscha il program da televisiun correspundent via HbbTV infurmaziuns supplementaras. Ultra da quai lubescha HbbTV l'access ad emissiuns gia emessas, a livestreams ed a tut ils programs da radio da la SSR. En pli cuntegna el ulteriurs servetschs per umans cun impediments dals senns, p.ex. suttitels ch'ins po configurar.
  • ina purschida publicistica per l'exteriur
    La purschida publicistica cuntegna: swissinfo.ch – la plattafurma online da la SSR per Svizras e Svizzers a l'exteriur, emissiuns franzosas sin TV5Monde, emissiuns tudestgas sin 3Sat e contribuziuns talianas sin la plattafurma online tvsvizzera.it.

Per purschidas online valan tranter auter ils suandants princips:

  • en il center stattan cuntegns audio ed audiovisuals;
  • contribuziuns da text senza connex cun in'emissiun en las spartas novitads, sport e regiunal/local èn restrenschidas a maximalmain 1000 segns per contribuziun;
  • gieus dastgan mo vegnir fatgs amogna en in connex temporal e tematic cun in'emissiun.

Basas legalas