Taxas da recepziun

Persunas che abitan en Svizra e che retschaivan programs da radio e da televisiun èn obligadas tenor la lescha da radio e televisiun (LRTV) da pajar taxas da recepziun, independentamain da las emissiuns ch'ellas guardan u taidlan ed er independentamain dal vectur, cun il qual ellas fan quai (antenna, cabel, satellit, telefon, telefonin, internet).

Liberadas da pajar taxas èn sulettamain persunas cun dretg a l'AVS ubain a l'AI ch'obtegnan prestaziuns tenor la Lescha federala davart las prestaziuns supplementaras tar l'assicuranza per vegls, survivents ed invaliditad.

La Confederaziun ha incumbensà la firma Billag d'incassar las taxas enfin la fin dal 2018.

La Confederaziun fixescha las taxas da radio e televisiun. Las entradas da taxas servan per gronda part a finanziar ils programs da radio e televisiun da la SSR (service public). 34 emetturs da radio e televisiun privats obtegnan medemamain ina part da quels daners per ademplir lur prestaziuns concessiunadas. Ina part da las entradas vegn impundida per promover tecnologias novas e per perscrutar il niz. Ultra da quai cuvran las entradas er ils custs per l'administraziun da la frequenza (UFCOM) e per l'incasso da las taxas da recepziun (Billag).

Nova taxa a partir da 2019

A partir dal 1. da schaner 2019 vegn incassada da las chasadas e da las interpresas ina taxa da radio e televisiun. La nova taxa independenta dals apparats remplazza la taxa da recepziun odierna che vegn abolida la fin dal 2018. La taxa da radio e televisiun munta a 365 francs per chasada privata ed onn; in'interpresa cun ina svieuta annuala da passa 500'000 francs paja tut tenor la svieuta tranter 365 e 35'590 francs l'onn.