Access senza barrieras

L'access senza barrieras als programs da la SSR cumpiglia tut ils commembers da la societad. La gronda purschida da cuntegns audiodescrits, cun suttitels ed en lingua da segns vegn amplifitgada cuntinuadamain – tematicamain e tecnicamain.

Per suandar il program dovran umans cun in impediment da la vesida u da l'udida suttitels, emissiuns en lingua da segns ed audiodescripziuns. Nus purschain a Svizras e Svizzers cun impediments dals senns in vast program durant la primetime e la fin d'emna. Latiers tutgan p.ex. las novitads principalas da la «Tagesschau» sin SRF, RTS e RSI en lingua da segns. En tut han var 30 000 uras dal program suttitels – quai correspunda a la mesadad dal temp d'emissiun.

Fin il 2022 amplifitgain nus questa purschida sin 45 000 uras (80 pertschient). Durant il temp d'emissiun principal ha gia ina gronda part da noss program audiodescripziuns per ils umans cun impediments dals egls – oz èn quai 420 uras, fin il 2022 vegnan a star a disposiziun 900 uras. Tar ils cuntegns en lingua da segns duain quai esser 1000 uras – en cumparegliaziun cun las 440 uras dad oz.

Nova cunvegna 2018–2022

Nus avain fatg ina cunvegna per ils onns 2018 fin 2022 cun set uniuns per umans cun impediments dals senns. En la cunvegna affirmain nus nossa veglia da sustegnair e d'integrar questas gruppas. La nova cunvegna s'orientescha a la convenziun da l'ONU per umans cun impediments.

Las uniuns partenarias èn la Federaziun svizra dals surds, pro audito svizra, Sonos, la Federaziun svizra dals tschorvs e flaivels da vesida, l'Uniun centrala svizra per il bain dals tschorvs e la Federaziun svizra dals geniturs dad uffants cun impediments da l'udida sco er il forom écoute.

Audiodescripziuns

Sin Play SRF e srf.ch vegnan las audiodescripziuns producidas da SRF purschidas sco audiodatotecas:

Lingua da segns

Sin Play SRF pudais Vus tschertgar sistematicamain emissiuns en lingua da segns:

Alle Sendungen in Gebärdensprache in unserer Videosammlung.

Internet senza barrieras

L'internet è per blers umans cun impediments dals senns in gidanter indispensabel en il mintgadi. Programs per umans cun impediments dals senns prelegian u engrondeschan ils cuntegns da paginas-web. Apparats accessorics translateschan cun agid da pitschens bastunets movibels in text-web en la scrittira da Braille (scrittira palpabla). Las paginas-web srf.ch e srgssr.ch èn programmadas uschia ch'ellas adempleschan las pretensiuns da tals apparats.