Solidaritad per tuts

La SSR vegn manada da l'incumbensa e da la finamira da cuntanscher tut ils umans en Svizra. Perquai è ella organisada a moda federalistica ed agescha solidaricamain. Solidaritad è service public.

Nus essan la suletta interpresa da medias che producescha purschidas audiovisualas en tut ils quatter territoris linguistics ed en tut las linguas naziunalas. La purschida per l'entira populaziun sa drizza tenor ils basegns dals umans cun differentas pretensiuns.

Nus pussibilitain a tuts l'access a noss programs: ad umans cun impediments dals senns, a la Svizra multiculturala ed a regiuns, en las qualas nus pudain porscher in program equivalent mo grazia a la gulivaziun da finanzas regiunala. Nossa purschida collia e surpassa ils cunfins da linguas, regiuns, gruppas e generaziuns.

Nus ans differenziain da purschiders commerzials, perquai che nus

  • resguardain tut las regiuns linguisticas sco era maioritads e minoritads
  • purschain ina varietad da temas, cuntegns e furmas da realisaziun
  • na represchentain betg mo la cultura, mabain la creain era
  • aspirain a la qualitad, credibladad e relevanza
  • essan politicamain ed economicamain independents

Nus ans mussain solidarics er en dumondas umanitaras:

La Chadaina da Fortuna, ina fundaziun che nus avain constituì il 1946, rimna donaziuns per umans basegnus. 25 ovras d'agid partenarias accreditadas da la Svizra realiseschan las acziuns operativas da la Chadaina da Fortuna. Ils daners da la Chadaina da Fortuna èn suttamess a trais controllas da finanzas e tutgan tar ils daners en Svizra controllads il meglier. Il 2016 è la Chadaina da Fortuna s'engaschada a favur da 167 projects en 42 pajais cun ina summa totala da 104 milliuns francs.

En Svizra ha la Chadaina da fortuna sustegnì 3283 persunas basegnusas cun bun 2 milliuns francs, 17 famiglias che han suffrì donns da malaura en Svizra han survegnì agid en l'autezza da var 261 000 francs.

La Chadaina da fortuna realisescha mintg'onn en stretga collavuraziun cun SRF l'acziun da collecta annuala «Mintga rap quinta» e dapi il 2016 en collavuraziun cun RTS «Cœur à Cœur».

È in'acziun da collecta caritativa en collavuraziun cun la Crusch Cotschna Svizra e La Posta. Svizras e Svizzers vegnan intimads da far in plaschair a dischavantagiads en Svizra ed a l'exteriur cun regalar in pachet.

È ina fundaziun che SRF ha constituì il 1968. Cun dus fin trais milliuns francs ad onn pussibilitescha la fundaziun a passa 10 000 umans cun impediments in eveniment da vacanzas e dal temp liber. Passa 50 000 persunas, uniuns e firmas en Svizra han fatg donaziuns da var 60 milliuns francs dapi las entschattas da la fundaziun.

L'emissiun «mitenand» da SRF rapporta mintg'emna en curtas reportaschas davart problems da la sanadad, da la miseria sociala e da l'ambient en Svizra ed en il Terz Mund. Las reportaschas mussan cun agid da persunas pertutgadas co che organisaziuns d'agid privatas reageschan sin questas sfidas.

Dapi il cumenzament dal 2005 stat «mitenand» sut il patrunadi da la SSR e vegn er emess sin RTS («ensemble») e RSI («insieme»).