Fairness e transparenza

Ils pajataxas pon spetgar da nus pled e fatg davart noss agir. Nus essan ina da las chasas da medias las pli transparentas en l'Europa e s'exprimin avertamain davart cifras ed activitads. Nus publitgain noss custs d'emissiuns e preschentain ils custs da noss emetturs da radio. Era las cifras ed ils fatgs en connex cun pajas e collavuraturs èn accessibels.  

Per noss var 6000 emploiads vulain nus esser ina patruna faira. Dapi il 2013 ans participain nus al dialog da l'egualitad da las pajas da la Confederaziun. Actualmain èn tar nus las pajas da las dunnas 3,7 pertschient pli bassas che quellas dals umens. En cumparegliaziun cun l'economia generala svizra è quai bain in bun resultat (il cunfin da toleranza da la Confederaziun è 5 pertschient), ma quai na tanscha anc betg. Ensemen cun il partenari social Sindicat svizzer dals meds da massa (SSM) prendain nus mesiras per reducir vinavant las differenzas.

Cun ina quota da dunnas da 43 pertschient è la relaziun tranter las schlattainas en la SSR relativamain equilibrada. Dal persunal ch'è engascha en il rom dal contract collectiv da lavur (incl. emprendists) importa la quota da dunnas 45 pertschient, dal cader 27 pertschient. Nus avain prendì en mira d'augmentar la quota da dunnas en il cader sin 30 pertschient fin il 2020. 52,2 pertschient da las collavuraturas e dals collavuraturs cun in contract collectiv da lavur lavuran a temp parzial (cader: 14,5 pertschient). Per augmentar la quota da lavur a temp parzial en il cader promovain nus pensums a temp parzial a chaschun da mintga reoccupaziun d'in post. 

Transparenza en il rapport annual

La SSR mussa co che las pajas da ses topcaders, caders e collavuraturs sa sviluppan e sa cumpareglia cun l'economia generala svizra e cun autras interpresas. Plinavant mussa ella l'indemnisaziun da la direcziun da las unitads d'interpresa e las pajas medias tenor gruppas professiunalas e tenor funcziuns schurnalisticas tschernidas.

Sin las paginas-web da SRF, RTS, RSI e RTR chatt'ins ils custs d'emissiuns da novitads, da magazins e da talkshows, da films e serias, d'emissiuns da divertiment e da musica, da documentaziuns e reportaschas sco era d'emissiuns da sport. Plinavant publitgeschan tut las unitads d'interpresa ils custs da lur emetturs da radio.

Sin las paginas-web da SRF, RTS, RSI e RTR chatt'ins ils custs da grondas coproducziuns naziunalas sco per exempel «Gotthard», «DADA DATA» u l'«emissiun naziunala dal 1. d'avust». Plinavant preschenta la SSR ils custs totals per ils dretgs da sport: ils ultims quatter onns èn quai stads en media 51,2 milliuns francs ad onn. La SSR porscha al public in program da sport cun passa 100 disciplinas. Quai è unic en l'Europa – er en la relaziun dals custs e dal gudogn: la purschida da sport custa 1 franc e 12 raps per emna e chasada. Dasper gieus olimpics e disciplinas popularas sco ballape, hockey sin glatsch e ski alpin survegnan era disciplinas ch'èn main en il focus ina plattafurma. Quai èn per exempel sports sco remblar, scrimar, nudar, ballamaun, unihockey, ballarait u golf.