Charta da schurnalissem

La Charta da schurnalissem SSR garantescha ch’ils programs da la SSR sa distinguan entras lur qualitad da cuntegn e furma. Ella contribuescha pia considerablamain a la creaziun da valur da la SSR sco interpresa da service public.

La Charta da schurnalissem pretenda da s’orientar tenor standards etics e professiunals e da resguardar ils basegns dal public. Ella accentuescha l’independenza da la SSR e sia responsabladad envers la societad. La Charta pretenda da betg sa laschar corrumper e da vegnir il pli datiers pussaivel a la vardad. Ella accentuescha la funcziun da furmar l’opiniun che la SSR ha e numna las premissas necessarias. La Charta da schurnalissem pretenda ultra da quai ch’ins saja pront da conceder sbagls e d’emprender dad els. Ed ella pretenda che la SSR rendia quint davart ses service public.

Charta da schurnalissem da la SSR

Nossa incumbensa è fixada en la Constituziun federala, en la lescha ed en la concessiun da la SRG SSR; nus ademplin quella en favur da la cuminanza. Al radio, a la televisiun e sin HbbTV, sin paginas d'internet, en applicaziuns ed en meds socials ans orientain nus vi da las medemas mesiras da la lavur schurnalistica professiunala e reflectain quella.

La Charta da schurnalissem fixescha il rom etic. Ella vala per tut ils cuntegns. Ella vala per tut las collavuraturas e per tut ils collavuraturs da la SRG SSR, er sch'ellas surdattan incumbensas a terzas persunas. RSI, RTR, RTS, SRF e SWI cumpletteschan la charta cun reglas per la lavur pratica.

 

 

Il public e l'engaschament per la cuminanza democratica stattan en il center da nossa lavur. La purschida sa drizza a tuttas e tuts en Svizra. Nus resguardain ils differents basegns e nizzegiain las vias da distribuziun adattadas. Nus tgirain il dialog cun utilisadras ed utilisaders, audituras ed auditurs, aspectaturas ed aspectaturs. Nus tractain els cun respect.

Nus reproducin e resplendain la varietad culturala, sociala, geografica e politica da la Svizra. Nus promovain la chapientscha tranter las differentas regiuns, las culturas e las cuminanzas e rinforzain la solidaritad. Nus contribuin a la furmaziun d’ina opiniun publica svizra: quai è per nus pli impurtant che l'individualisaziun da purschidas. Nus promovain il barat cun Svizras e Svizzers a l'exteriur e l'integraziun da conburgaisas e conburgais esters. Nus procurain per lur preschientscha en nossas purschidas.

Tant nossa posiziun sco er nossa purschida èn independentas. Nus prendain decisiuns schurnalisticas betg influenzadas da la politica, da l'economia e d'autras gruppas d'interess. Nus n'ans suttamettain a naginas pressiuns. Nus decidain independentamain d'interess u da preferenzas persunalas. Nus n'ans laschain betg corrumper.

L’imparzialitad è nossa maxima fundamentala. Nus na favurisain naginas posiziuns u interess, a medem temp represchentain nus las valurs da nossa societad. Nus stgaffin spazi avert e liber per la discussiun a basa d’enconuschientschas dals fatgs. Nus chattain agens access a temas. Nua che quai è pussaivel elegiain nus sezs temas, empè d'ans laschar dictar temas.

Qualitad e professiunalitad stattan en il center da nossa lavur. Bun schurnalissem vul dir: tschertgar infurmaziuns, examinar, controllar, classifitgar, valitar, declerar, sche necessari commentar e rectifitgar. Eruir ils fatgs è pli impurtant che la spertadad ed ils sforzs da publitgar.

Nus enconuschain noss duairs etics e legals. Quels determineschan nossa responsabladad envers la societad, en nossa lavur schurnalistica classica, cun curatar cuntegns generads d'utilisaders e cun moderar forums da discussiun en l'internet. Tecnologias ed algoritmus èn meds d'agid che na remplazzan ni il giudicat professiunal ni la responsabladad schurnalistica.

En la lavur schurnalistica tractain nus tut las persunas cun respect – sche necessari criticamain, dentant fair. La presumziun d'innocenza vala per tut las retschertgas en connex cun cas criminals. Nus respectain la sfera privata da tut las persunas, danor sche l'interess public predominescha per in motiv u l'auter. Nus dain fadia da betg discriminar insatgi e da betg sustegnair la discriminaziun. Umans che dovran protecziun, causa lur persunalitad, lur vegliadetgna u autras circumstanzas, protegin nus adequatamain; attenziun speziala dain nus cunzunt als uffants.

Nus ans dain fadia d'eruir tut quai ch'è relevant per chapir in fatg. Il schurnalissem critic retschertga tant ils elements en favur sco quels en disfavur d’ina persuna u chaussa: nus na tgirain betg in schurnalissem da tesas tendenzius. Infurmaziuns ans procurain nus a moda eticamain correcta e legalmain impeccabla. Nus declerain adina avertamain nossas intenziuns. Infurmaziuns da l'internet e da meds socials controllain nus cun acribia.

Entaifer la massa d'infurmaziuns dain nus paisa a la vardaivladad ed a la relevanza da nossa purschida. Nus derasain mo infurmaziuns da funtaunas fidadas. Nus ans stentain da mussar l'actualitad cun resguardar tut ils aspects e las vistas decisivas. Nus mussain il mund, ils umans e lur agir cun tut lur expressiuns – las bunas e las malas, las renconuschidas e las dischagreablas, las cuntraversas, las provocativas e las schoccantas. Nus essan conscients dals effects e da las consequenzas che nossa purschidas po avair sin il public.

Sche nus prendain posiziun, sa basa quella sin noss giudicat professiunal e sin las valurs da nossa societad. Commentaris identifitgain nus sco tals. Nus refusain mintga furma da manipulaziun u sfalsificaziun da la vardad cun agid da maletgs, tuns e texts. Infurmaziuns sbagliadas curregin nus immediat e bain visibel en il vectur ch'ha derasà ellas.

Forums da discussiun sin nossas pagina d'internet u en meds socials moderain nus. Nus publitgain sulettamain ils votums da participantas e participants che sa dattan d'enconuscher cun lur entir num.

Nus essan transparents e mussain co che nus lavurain, tge che nus vulain, co che nus procedin, tge che nus pudain prestar e tge betg. Quai vala pir da dretg il mument cur che nus rapportain davart las activitads ed ils interess da nossa interpresa.

La creativitad è il motor da nossa lavur. En la midada digitala promovain nus l'innovaziun ed il spiert d’experimentader. Nus ans basain sin l’avertezza dal spiert e da las ideas.