Ina retschertga cun 1500 persunas en Svizra

En il rom da las refurmas annunziadas il 2018 ha la SSR lantschà il project «Public Value» ed inizià in process da consultaziun per observar co che la populaziun percepescha sia contribuziun al service public. Discussiuns, lavuratoris ed ina retschertga cun 1'500 persunas en Svizra han permess d'eruir differentas prioritads per l'interpresa.

Jean-Michel Cina, president dal cussegl d'administraziun ed Irène Challand, responsabla dal project.

Irène Challand, tge impressiuns has ti suenter questa emprima fasa da consultaziun?

Ils differents inscunters che nus avain organisà èn stads ordvart fritgaivels. La SSR vegn stimada fitg e las spetgas correspundan a questa stima. Quai è sa mussà bain tant en ils 74 discurs da fatscha a fatscha sco er en il rom dals 28 lavuratoris organisads internamain u cun la populaziun. La structura da las 30 dumondas è adina stada la medema e la qualitad da las respostas e da las reclamaziuns è stada auta, independentamain da la regiun linguistica. Entaifer dus mais avain nus rimnà passa 5'000 infurmaziuns verbalas davart la percepziun da la SSR e las spetgas visavi ella. L'agentura Altermondo las ha alura collià cun ils resultats da la retschertga represchentativa realisada da l'institut Link. Jau envid in e scadin da leger il rapport che reflectescha la ritgezza e la diversitad da las reclamaziuns che nus avain survegnì en las quatter regiuns linguisticas da la Svizra. Quai è stada ina grondiusa experientscha sociologica.

Tgenins èn ils resultats dal rapport?

La SSR ha plitost in bun image quai che reguarda sias valurs da service public, era sch'in terz da las persunas interrogadas è da l'opiniun che la SSR na resguardia betg avunda ils basegns da la societad. Nus vegnin a lavurar vi da numerus temas; set tematicas ha la direcziun da la SSR definì sco prioritaras. La legitimitad da la SSR vegn renconuschida e las sfidas impurtantas, a las qualas l'interpresa ha da far frunt actualmain en vista al svilup en il mund da las medias, vegnan era numnadas regularmain.

Tgeninas èn las proximas etappas?

L'uniun SSR cun sias societads regiunalas organisescha discussiuns en las regiuns per approfundar quests set temas, als priorisar e per mobilisar l'intelligenza collectiva. Las enconuschientschas principalas vegnan documentadas en in rapport naziunal che vegn preschentà a la SSR il zercladur 2020. Alura vegnin nus ad analisar entaifer l'interpresa questa emprima consultaziun ed eruir las differenzas tranter la percepziun externa ed interna. Nus stuain esser pronts d'identifitgar l'onn proxim las vias da svilup pussaivlas.

«La finamira dal concept da ‹Public Value› è da mesirar la contribuziun dal service public a la societad.»
Irène Challand, responsabla dal project