Respargns, partenadis e novas prioritads tar la SSR

Sco annunzià ils 4 da mars 2018 vul la SSR realisar ils proxims quatter onns in plan da spargn e da reinvestiziun. Ella vegn a spargnar en total 100 milliuns francs e reinvestir 20 milliuns da quels. D'ina vart reagescha la SSR uschia sin la decisiun dal Cussegl federal da plafonar las entradas da taxas e sin las entradas da reclama regressivas. Da l'autra vart prepara ella uschia l'interpresa per las sfidas da l'avegnir.  

Augment d'effizienza e respargns da 100 milliuns francs

La clera refusa da l'iniziativa No Billag è era stada in signal da la populaziun svizra en favur da programs d'auta qualitad da la SSR en tut las quatter parts dal pajais. Perquai duai il program da spargn tangar uschè pauc sco pussaivel las purschidas da radio, televisiun ed online.

Ils respargns vegnan repartids sin las singulas unitads d'interpresa da la SSR sco suonda: 20 milliuns francs sin SRF, 15 milliuns sin RTS, 15 milliuns sin la direcziun generala, 10 milliuns sin RSI, 1 milliun sin RTR ed 1 milliun sin SWI. Ils respargns surordinads – surtut en ils secturs infrastructura e distribuziun – muntan a 40 milliuns francs. En tut las regiuns è perquai previsa ina reducziun signifitganta dals custs da las immobiglias – resguardond la francada regiunala da la SSR.

Per cuntanscher la finamira da spargn vegni er ad esser indispensabel da reducir las plazzas. En l'entira interpresa ston ins quintar ils proxims quatter onns cun ina reducziun da var 250 plazzas a temp cumplain – ina part essenziala da quella duai succeder cun partenzas natiralas. Tuttina n'èn relaschadas betg exclusas. Enfin la fin da settember lavura la SSR vi da la planisaziun detagliada, silsuenter vegn ella a tadlar il partenari social sco era las collavuraturas ed ils collavuraturs. La realisaziun cumenza a partir dal 2019. Per las collavuraturas ed ils collavuraturs pertutgads stat a disposiziun in plan social.

Cooperaziuns e partenadis public-privats

A partir dal 2019 vegn la SSR a realisar l'avertura annunziada da l'archiv. Ella vul era vinavant rinforzar la cuntrada da medias svizra cun partenadis nizzaivels. Perquai parta ella gia dapi mais ses videos d'infurmaziun cun entant passa 40 purschiders da medias privats. Ensemen cun trais societads da radio privatas lantscha ella a partir da questa stad in Swiss Radioplayer.

En collavuraziun cun l'École polytechnique fédérale de Lausanne (EPFL), las Universitads da Genevra, Losanna, Neuschatel, da la Svizra taliana sco era cun Ringier sviluppa ella in center da cumpetenza. Quel sustegna ed accumpogna projects en il sectur da l'innovaziun da medias. Il project en Svizra romanda è er avert per autras universitads e chasas edituras. In partenadi sumegliant exista gia a Turitg tranter la SPF, Ringier, Tamedia, la NZZ e la SSR.

La SSR ha decidì da vender sia part d'aczias da 33,3 pertschient da la firma da commerzialisaziun Admeira als dus cunacziunaris Swisscom e Ringier. Il contract da cumpra è vegnì suttascrit ils 26 da zercladur e va en vigur proximamain. La SSR è vinavant da l'opiniun ch'igl è oz pir che mai impurtant da concepir cuminaivlamain la plazza da medias svizra e da rinforzar ella visavi la concurrenza internaziunala.

Il svilup empermettent dad Admeira, sia forza innovativa e la qualitad da las purschidas da medias, garantida da la pli gronda interpresa da commerzialisaziun da la Svizra, èn motivs pertge che la SSR lascha vinavant commerzialisar Admeira ses spots da reclama e sias purschidas da sponsoring. Cun vender la part d'aczias ed uschia renunziar a la responsabladad operativa, vuless la SSR sustegnair la recepziun da novs acziunaris tar Admeira.

Nova orientaziun e prioritads

Cun 20 dals totalmain 100 milliuns ch'èn da spargnar vul la SSR rinforzar ils proxims quatter onns sias caracteristicas distinctivas ed investir en sia plivalur.

• En il sectur cultural: cun investir en atgnas producziuns svizras – surtut serias da tv – en collavuraziun cun partenaris externs. A partir dal 1. da schaner 2019, suenter la scadenza dals contracts vertents, renunzia la SSR ultra da quai sco gia annunzià a l'interrupziun cun reclama per films emess durant la primetime sin SRF, RTS e RSI.
• En il sectur digital: cun crear ina plattafurma digitala nunlineara che permetta da nizzegiar a moda pli simpla e persunalisada ils cuntegns da la SSR sur ils cunfins linguistics ora cun suttitels e sincronisaziuns. Ultra da quai renunzia la SSR a partir dal 2019 da publitgar texts betg colliads cun contribuziuns d'audio u da video sin las paginas-web d'infurmaziun da SRF, RTS e RSI. Uschia vul la SSR accentuar anc pli fitg sias caracteristicas distinctivas visavi l'offerta online (pajada) dals purschiders privats. 

La SSR vul adattar ses edifizis als basegns sa midads en la producziun audiovisuala e digitala. En quel senn vegn examinada pli en detagl fin l'atun 2018 la midada pussaivla d'ina part da la redacziun da radio da SRF da Berna a Turitg.

Il cussegl d'administraziun e la direcziun generala da la SSR considereschan las mesiras decididas sco ulteriur pass impurtant per accelerar il process da midaments da l'interpresa definì cuminaivlamain. Suenter avair consultà ils partenaris socials examinescha il Cussegl d'administraziun detagliadamain il plan da spargn e d'augment d'effizienza enfin la fin da l'onn. El duai vegnir approvà e mess en vigur a partir dal schaner 2019.

 

Post da medias SSR

Edi Estermann
medienstelle.srg(at)srgssr.ch / tel. 031 350 95 95