Nathalie Wappler daventa directura da SRF
Il cussegl d'administraziun da la SRG SSR è suandà unanimamain la proposta da la suprastanza regiunala da la SRG Deutschschweiz ed ha elegì Nathalie Wappler sco nova directura da SRF a chaschun da sia sesida dals 5 da november. La directura da program dal Mitteldeutscher Rundfunk MDR surpiglia sia nova funcziun la primavaira 2019.
Per l'elecziun da la directura da SRF è responsabel il cussegl d'administraziun SRG SSR. El elegia sin proposta da la SRG Deutschschweiz. Nathalie Wappler ha persvadì ils commembers da la cumissiun en la procedura da nominaziun betg mo cun sia experientscha da blers onns sin il sectur da medias, mabain era cun sia cumpetenza strategica, sia moda da pensar analiticamain, ses bun nas per las sfidas che spetgan il service public medial e sia chapientscha per ils process e las realitads sociopoliticas en Svizra. Plinavant ha Nathalie Wappler bunas cumpetenzas da manar.
Nathalie Wappler surpiglia la direcziun da SRF la primavaira 2019. Fin là maina Ruedi Matter (65) l'interpresa. Co che la surdada vegn organisada definesch'ins las proximas emnas ensemen cun il directur general da la SSR Gilles Marchand.
Nathalie Wappler Hagen nascha l'onn 1968 a Son Gagl. Ella terminescha ses studi d'istorgia, scienzas politicas e germanistica ils onns 1990 a l'Universitad da Constanza cun il Magister Artium. Studis a l'exteriur la mainan a l'Universitad da Bristol en Gronda Britannia ed a l'Universitad da Stanford a California.
Ses emprims onns da professiun passenta ella sco redactura tar ARD (WDR), ZDF e sco scheffa d'ediziun tar 3sat. Dal 2005 fin la midada tar il Mitteldeutscher Rundfunk MDR lavura Nathalie Wappler en differentas funcziuns per SRF. A partir dal 2009 accumpogna ella sco managera da projects en funcziun responsabla differents process da midada tar SRF, sviluppa strategias per in radio da cultura modern e per novs films e novas serias sco era models da plazs da lavur trimedials. Sco manadra da la partiziun Cultura da SRF è ella commembra da la direcziun generala da SRF e commembra da la direcziun generala da l'emettur communal da lingua tudestga 3sat sco era commembra dal cussegl d'administraziun da Telepool, l'interpresa internaziunala per la commerzialisaziun da programs. Dapi il 2016 è Nathalie Wappler directura da program dal Mitteldeutscher Rundfunk MDR.
Andreas Schefer, president da la SRG Deutschschweiz e commember dal cussegl administrativ da la SSR: «Dal punct da vista dals purtaders ma legrel jau sin la collavuraziun cun Nathalie Wappler e sco commember dal cussegl administrativ sun jau persvas che nus avain prendì la dretga decisiun.»
Il directur general da la SSR Gilles Marchand: «Jau hai plaschair da dastgar beneventar Nathalie Wappler en la direcziun generala da la SSR. Sia experientscha, sia savida professiunala e sias enconuschientschas da las relaziuns svizras vegnan ad esser da grond avantatg en questa fasa da transfurmaziun radicala da la SSR e da SRF. Areguard las valurs e las sfidas dal service public essan nus dal tuttafatg d'accord.»
Nathalie Wappler davart sia elecziun: «Jau hai grond plaschair da pudair surpigliar la direcziun da SRF e da m'engaschar per in ferm service public medial en Svizra.»
Contact:
Andreas Schefer, president SRG.D, andreas.schefer(at)bluewin.ch, 079-705 46 10
Annina Keller, manadra secretariat SRG.D, annina.keller(at)srf.ch, 044-305 67 01
Edi Estermann, manader post da medias SRG SSR, medienstelle.srg(at)srgssr.ch, 031 350 95 95
