La musica svizra da mx3.ch ussa per tut ils emetturs svizzers da radio
Tut ils emetturs svizzers da radio, tuttina sch'els èn concessiunads u betg, han uss access a mx3.ch – la banca da datas da musica actuala svizra. Questa plattafurma utilisada fin ussa da radios cun in mandat da service public è en il futur averta era per radios privats. Quai è in ulteriur pass da la SSR per collavurar cun las medias privatas – confurm a la nova concessiun dal Cussegl federal.
mx3 è la plattafurma da la SSR per musica actuala fundada il 2006. Tut ils emetturs da radio da la Svizra pon ussa transmetter gratuitamain tut ils cuntegns da la plattafurma. La plattafurma funcziuna sumegliant sco las grondas websites da telechargiar musica. L'emprim telechargian ils artists u lur labels la musica via lur conto sin la plattafurma. Alura pon tut ils emetturs svizzers da radio emetter las chanzuns. Ils artists svizzers daventan uschia visibels per redacziuns da musica, per organisaturs da festivals e per la publicitad.
Ils emetturs da radio privats pon tschertgar musica svizra sin la plattafurma e telechargiar las chanzuns che plaschan en in format betg cumprimì. Las premissas tecnicas èn facilitadas. Ils emetturs da radio profiteschan d'ina meglra visibilitad, perquai che lur num vegn visualisà ensemen cun la chanzun emessa. Er ils aspects giuridics èn gia reglads. Quai simplifitgescha la lavur dals emetturs da radio. «Avrir la banca da datas da mx3 è in ferm signal da la SSR per mussar la voluntad da collavurar cun las medias privatas», accentuescha Samuel Vuillermoz, responsabel per la plattafurma mx3.
L'avertura correspunda er al giavisch da la SSR da promover ina purschida digitala cumpletta. Ins metta a disposiziun a las moderaturas ed als moderaturs era tut las infurmaziuns davart ils artists e las chanzuns. Quai signifitga per exempel era ch'ins vesa durant ir cun auto las infurmaziuns davart la chanzun sin il display dal radio. Questa funcziun fa era senn en vista al svilup da «smart speakers» ch'ins chatta pli e pli savens en las chasadas svizras. Samuel Vuillermoz precisescha: «Suenter avair introducì il 2018 l'applicaziun mobila Swiss Radio Player faschain nus in ulteriur pass revoluziunar en il mund d'audio».
Davart mx3
mx3 è la plattafurma da la SSR per musica actuala fundada il 2006. Ella vegn tratga a niz cunzunt da SRF3, SRF Virus, Couleur3, Rete3 e Radio Rumantsch. Ils musicists pon preschentar lur chanzuns a tut las redacziuns da musica e tut ils radios svizzers las pon emetter. Fans da musica, organisaturs da festivals e labels pon s'annunziar e scuvrir la producziun da musica svizra. Mintga mais visitan en media passa 100 000 persunas mx3 e mintga di s'annunzian var 5 novas gruppas da musica sin la plattafurma. mx3 cumpiglia passa 100 000 titels auditivs e passa 7000 clips da video. En total vegnan passa 8000 tocs emess regularmain sin ils radios partenaris da mx3.
Post da medias SSR
medienstelle.srg(at)srgssr.ch/ tel. 031 350 95 95
