Dapli serias svizras per la Svizra

La SRG SSR vul a lunga vista dublegiar il dumber da serias svizras ed investescha perquai var 15 milliuns francs dapli ad onn. Da nov duain las producziuns vegnir emessas en tut las regiuns. Cun quest pass rinforza la SSR la singularitad da sia purschida e po sa differenziar da las plattafurmas da streaming internaziunalas.

Sin tut il mund èn serias dumandadas pli che mai. Er en Svizra ha quest gener grond success: producziuns sco «Der Bestatter», «Quartier des banques» ubain «Wilder» chattan fitg buna accoglientscha tar il public. La SSR vul per quest motiv producir en l'avegnir dapli serias ed investir pass per pass ulteriurs 15 milliuns francs ad onn.

Las unitads d'interpresa da la SSR vegnan a metter a disposiziun lur serias en tut las regiuns: en las linguas naziunalas tudestg, franzos, talian e rumantsch – en ina versiun sincronisada ubain cun suttitels. Ultra da quai èn las producziuns da vesair sin tut ils vecturs – damai en il program linear, en l'internet e sin la nova plattafurma da la SSR. E quai sche pussaivel il medem temp. La finamira da la SSR è da producir set fin otg serias ad onn. L'entschatta da schaner 2020 vai liber sin SRF cun la seria da crimi «Wilder 2».

Las suandantas serias èn planisadas per l'onn 2020:

  • «Wilder 2» (SRF)
  • «Quartier des banques 2» (RTS)
  • «Bulle» (RTS)
  • «Frieden» (SRF)
  • «Metta da fein» (RTR)
  • «Cellule de crise» (RTS)
  • «Advent, Advent» (SRF)

Sven Wälti, la SSR vul producir dapli serias svizras. Pertge?

Quai ha divers motivs. La furma narrativa è autra che tar in film da 90 minutas. Ina seria dat a nus dapli temp da sviluppar istorgias e lur figuras e da tegnair la tensiun sur pliras episodas. Fin ussa avain nus pudì producir mo trais fin quatter serias ad onn. Nossa finamira è da dublegiar a lunga vista il dumber da serias. Quai permetta a nus da cuntanscher il public anc meglier e pli savens cun istorgias da noss pajais. Quai na fa uschiglio nagin en Svizra. Il medem mument rinforzain nus la branscha da films svizra cun producir dapli serias. Tuts profitan da quai: las acturas, ils tecnicists da film e la cinematografia. Ed er ils scripts vegnan megliers, sch'i vegn scrit dapli.

A partir dal 2020 èn previs cun «Wilder 2», «Quartier des banques 2», «Helvetica» e «Cellule de Crise» gist quatter thrillers. Sa focussescha la SSR conscientamain sin quest gener?

I fiss memia simpel da reducir questas serias sin in gener. Tematicamain sa differenzieschan questas serias cleramain. «Wilder 2» ha ferms elements da crimi, «Quartier des banques 2» è situà en il milieu da bancas ed è a medem temp in drama da famiglia. Ma igl è propi uschia che thrillers e dramas èn geners populars che nus emettain sa chapescha fitg gugent.

«Nus n'avain anc ditg betg cuntanschì il zenit.»

Produceschan SRF e RTS tut sulettas serias sco «Wilder 2» ubain «Helvetica»?

Tut nossas serias vegnan fatgas da producents independents. Er ils scripts vegnan scrits d'auturas e d'auturs externs. Nus essan uschenumnadas coproducentas, quai vul dir che nus finanziain las serias per ina gronda part ed accumpagnain ils projects redacziunalmain durant l'entira fasa da svilup.

Netflix ha lantschà il 2019 var 30 serias producidas en atgna reschia. N'è il martgà svizzer betg gia surchargià cun serias?

Sch'ins considerescha il martgà internaziunal – i na dat gea betg mo Netflix –, po quai constar. Ma sin naginas da quellas plattafurmas na chatt'ins serias svizras. Nus n'avain anc ditg betg cuntanschì il zenit. Cun nossas serias pudain nus ans distinguer da las plattafurmas da streaming internaziunalas e porscher a noss public ina plivalur.

Tge public en mira vul la SSR cuntanscher cun sias serias?

Sche pussaivel tuts, giuven e vegl! Serias custan bler, perquai mettain nus il focus sin la primetime. Uschia vulain nus cuntanscher in vast public. I duai però era dar serias per in public pli giuven, serias sco «Seitentriebe» da SRF ubain la seria-web planisada «Metta da fein» da RTR che vegn lantschada l'atun 2020 sin la nova plattafurma da la SSR. Cun augmentar il dumber da serias vegnin nus er ad avair la pussaivladad da producir serias pli ristgadas che enfin qua.

Sven Wälti, manader da la partiziun film SSR

Tge seria che vegn emessa il 2020 è voss highlight persunal e pertge?

Jau ma legrel sin tut las serias svizras novas che vegnan emessas l'onn 2020. Quai dat propi ina buna chaussa. Nus avain gì dacurt ina premiera dubla al Festival internaziunal dal film GIFF a Genevra cun las segundas staflas da «Wilder 2» da SRF e «Quartier des banques 2» da RTS. Il public ha laschà plaschair ordvart bain omaduas serias, e cun quellas avain nus surmuntà definitivamain il foss dal rösti. Jau sun er ordvart spanegià sin la seria istorica «Frieden», scritta da Petra Volpe («Die göttliche Ordnung»). Igl è l'emprima seria che nus avain coproducì cun l'emettur franzos-tudestg Arte. Quai è ina bella renconuschientscha e dat a la seria er attenziun internaziunala. Ed jau poss strusch spetgar che vegn emessa la tschintgavla stafla da la seria americana «Better call Saul». Mia seria absolutamain preferida ordaifer la Svizra ...