Dapli serias svizras per la Svizra

La SRG SSR vul a lunga vista dublegiar il dumber da serias svizras ed investescha perquai var 15 milliuns francs dapli ad onn. Da nov duain las producziuns vegnir emessas en tut las regiuns. Cun quest pass rinforza la SSR la singularitad da sia purschida e po sa differenziar da las plattafurmas da streaming internaziunalas.

Sin tut il mund èn serias dumandadas pli che mai. Er en Svizra ha quest gener grond success: producziuns sco «Der Bestatter», «Quartier des banques» ubain «Wilder» chattan fitg buna accoglientscha tar il public. La SSR vul per quest motiv producir en l'avegnir dapli serias ed investir pass per pass ulteriurs 15 milliuns francs ad onn.

Las unitads d'interpresa da la SSR vegnan a metter a disposiziun lur serias en tut las regiuns: en las linguas naziunalas tudestg, franzos, talian e rumantsch – en ina versiun sincronisada ubain cun suttitels. Ultra da quai èn las producziuns da vesair sin tut ils vecturs – damai en il program linear, en l'internet e sin Play Suisse. E quai sche pussaivel il medem temp. La finamira da la SSR è da producir set fin otg serias ad onn. 

Las suandantas serias èn planisadas per l'onn 2021:

  • Neumatt (SRF)
  • La chance de ta vie (RTS)
  • Sacha (RTS)

Sven Wälti, la SSR vul producir dapli serias svizras. Pertge?

Quai ha divers motivs. La furma narrativa è autra che tar in film da 90 minutas. Ina seria dat a nus dapli temp da sviluppar istorgias e lur figuras e da tegnair la tensiun sur pliras episodas. Fin ussa avain nus pudì producir mo trais fin quatter serias ad onn. Nossa finamira è da dublegiar a lunga vista il dumber da serias. Quai permetta a nus da cuntanscher il public anc meglier e pli savens cun istorgias da noss pajais. Quai na fa uschiglio nagin en Svizra. Il medem mument rinforzain nus la branscha da films svizra cun producir dapli serias. Tuts profitan da quai: las acturas, ils tecnicists da film e la cinematografia. Ed er ils scripts vegnan megliers, sch'i vegn scrit dapli.

«Nus n'avain anc ditg betg cuntanschì il zenit.»

Netflix ha lantschà il 2019 var 30 serias producidas en atgna reschia. N'è il martgà svizzer betg gia surchargià cun serias?

Sch'ins considerescha il martgà internaziunal – i na dat gea betg mo Netflix –, po quai constar. Ma sin naginas da quellas plattafurmas na chatt'ins serias svizras. Nus n'avain anc ditg betg cuntanschì il zenit. Cun nossas serias pudain nus ans distinguer da las plattafurmas da streaming internaziunalas e porscher a noss public ina plivalur.

Tge public en mira vul la SSR cuntanscher cun sias serias?

Sche pussaivel tuts, giuven e vegl! Serias custan bler, perquai mettain nus il focus sin la primetime. Uschia vulain nus cuntanscher in vast public. I duai però era dar serias per in public pli giuven, serias sco «Seitentriebe» da SRF ubain la seria-web planisada «Metta da fein» da RTR. Cun augmentar il dumber da serias vegnin nus er ad avair la pussaivladad da producir serias pli ristgadas che enfin qua.

Sven Wälti, manader da la partiziun film SSR