Taxa da radio e televisiun
Persunas che abitan en Svizra e che retschaivan programs da radio e da televisiun èn obligadas tenor la lescha da radio e televisiun (LRTV) da pajar taxas da recepziun, independentamain da las emissiuns ch'ellas guardan u taidlan ed er independentamain dal vectur, cun il qual ellas fan quai (antenna, cabel, satellit, telefon, telefonin, internet).
Liberadas da pajar taxas èn sulettamain persunas cun dretg a l'AVS ubain a l'AI ch'obtegnan prestaziuns tenor la Lescha federala davart las prestaziuns supplementaras tar l'assicuranza per vegls, survivents ed invaliditad.
La Confederaziun ha incumbensà la firma Serafe d'incassar las taxas.
La Confederaziun fixescha las taxas da radio e televisiun. Las entradas da taxas servan per gronda part a finanziar ils programs da radio e televisiun da la SSR (service public). 34 emetturs da radio e televisiun privats obtegnan medemamain ina part da quels daners per ademplir lur prestaziuns concessiunadas. Ina part da las entradas vegn impundida per promover tecnologias novas e per perscrutar il niz. Ultra da quai cuvran las entradas er ils custs per l'administraziun da la frequenza (UFCOM) e per l'incasso da las taxas da recepziun (Serafe).
Dapi il 1. da schaner 2019 vegn incassada da las chasadas e da las interpresas ina taxa da radio e televisiun. La taxa da radio e televisiun munta a 335 francs per chasada privata ed onn (dapli 2021).
