Aktuelle Position
Sport
Il sport fascinescha, sveglia emoziuns ed entusiasmescha. El superescha las barrieras linguisticas e culturalas ed unescha ils umans. Perquai s'engascha la SSR vastamain per il sport.
Il sport furma ina part impurtanta da l'incumbensa da service public da la SSR: il radio e la televisiun drizzan lur attenziun sin sportists svizzers da renum naziunal ed internaziunal e porschan al public in program da sport varià ed adattà als basegns svizzers cun ils highlights da la Svizra e da l'exteriur. Il sport è tensiun pura: el entusiasmescha ed offra grondas emoziuns.
Rapports da sport multifars
En ses programs da radio e televisiun rapporta la SSR regularmain da passa 60 differents sports. La strategia da sport da l'interpresa è da porscher in program quotidian attractiv che satisfa a las spetgas dal public e dal martgà. Per cuntanscher questa finamira lavura la SSR cun il suandant model da trais pitgas:
| Mussar sportists svizzers | Rapportar dad occurrenzas da sport en Svizra | Emetter las pli impurtantas occurrenzas da sport internaziunalas |
| A questa categoria appartegnan sportists sco Simone Niggli, Roger Federer, Nicola Spirig, Lara Gut, Simon Ammann, Tom Lüthi, Mark Streit, Fabian Cancellara, però era disciplinas da sport sco ir cun skis, chavaltgar e dar tennis. | I sa tracta dad occurrenzas da sport sco las cursas da skis dad Adelboden e Wengen, la Weltklasse Zürich, l'Athletissima da Losanna, il Tour de Suisse, il Tour de Romandie, la concurrenza da chavaltgar CSIO Svizra, la Cuppa Spengler, ils campiunadis da ballape e da hockey sin glatsch, ils Golf European Masters a Crans-Montana, la regatta «Ruderwelt» da Lucerna, il beachvolley da Gstaad, la Festa federala da lutgaders e signuns, la festa da gimnastica e la festa da tir. | Questa categoria cumpiglia ils highlights dal sport mundial sco ils gieus olimpics, ils campiunadis europeics e mundials da ballape, l'UEFA Champions League, la furmla 1, il campiunadi mundial da skis, il Tour de France, il campiunadi europeic e mundial d'atletica leva u ils turniers da tennis da grand slam. |
Ils rapports da sport dal radio e da la televisiun han la finamira da mussar la realitad dal sport ord optica svizra.
Business Unit Sport
La Business Unit Sport (BUS) è responsabla per la realisaziun da la strategia da sport da la SSR. La BUS procura d'ina vart per ils dretgs da sport e per la producziun d'occurrenzas da sport naziunalas, da l'autra vart organisescha e coordinescha ella gronds projects internaziunals per ils emetturs da radio e televisiun da la SSR sco ils gieus olimpics u ils campiunadis europeics e mundials. Ultra da quai administrescha la BUS ils budgets da sport naziunals.
Custs totals per gronds projects da la SRG SSR dal 1998 fin il 2010 (dretgs e producziun)
Legenda: ils onns pèrs han lieu ils gieus olimpics ed ils campiunadis europeics e mundials da ballape, ils onns spèrs oravant tut ils campiunadis da skis e da passlung.
Ils rapports da sport da la SSR basegnan in budget adina pli aut, quai surtut perquai che la commerzialisaziun e la birocratisaziun giuridica dal sport daventan pli e pli fermas. L'Uniun europeica metta grondas occurrenzas da sport adina pli savens sin il medem stgalim sco interpresas economicas, sch'i va per dumondas davart la concurrenza e davart las medias. Quai ha per consequenza che mesiras areguard il dretg da concurrenza e mesiras en connex cun il dretg da medias sa manifesteschan adina dapli en contracts.
Ultra da quai garanteschan ils commerzialisaders dad occurrenzas da sport als sponsurs adina dapli exclusivitad sin tut las plattafurmas pussaivlas. Surtut ils interess commerzials liads a grondas occurrenzas da sport sco ils gieus olimpics ed ils campiunadis europeics e mundials da ballape han ils ultims onns chaschunà in augment massiv dals custs per ils dretgs da transmissiun e da producziun.
Svilup dals custs per ils dretgs da l'European Broadcasting Union (EBU) per ils gieus olimpics dal 1980 fin il 2012
Sfidas sportivas
- Gronda diversitad: La muntada da sports telegens crescha ad in crescher. Uschenumnads sports da premium sco la furmla 1 ed il ballape ed occurrenzas da premium sco ils gieus olimpics, ils campiunadis europeics e mundials da ballape u l'UEFA Champions League vegnan a pudair rinforzar lur posiziun dominanta al televisur. En quest martgà da sport globalisà daventan disciplinas tradiziunalas sco l'atletica leva, il ciclissem, il chavaltgar, il remblar, la gimnastica u il nudar adina main relevantas en tut il mund. Cun sia strategia da sport va la SSR in'autra via sin il territori d'emissiun svizzer, perquai ch'ella vul er en l'avegnir porscher al public ina vasta paletta dad emissiuns da sport ed uschia promover la diversitad dad occurrenzas svizras d'impurtanza naziunala ed internaziunala.
- Render transparent maldiever ed engion: Ils schurnalists da sport da la SSR mantegnan la distanza necessaria da las occurrenzas e dals atlets. Els rapportan a moda transparenta, critica, objectiva e senza pregiudizis – era d'eveniments negativs en connex cun il sport sco acts da violenza en ils stadions, engion, corrupziun e doping.
Videos: Service public für die Schweiz
Paginas d'internet da la SSR
Videoclips SSR
