Aktuelle Position
Solidaritad
La gulivaziun da finanzas permetta da producir programs equivalents en las differentas parts dal pajais. Ultra da quai promova la SSR il barat tranter las cuminanzas linguisticas sco era tranter las culturas, e s'engascha per las minoritads.
La gulivaziun da finanzas solidarica permetta programs equivalents
La SSR reparta sias entradas da taxas e da la reclama tenor ina clav da finanziaziun a sias unitads d'interpresa da radio e televisiun en las quatter regiuns linguisticas. Grazia a questa gulivaziun da finanzas tranter las regiuns linguisticas obtegnan las unitads d'interpresa Radio Télévision Suisse (RTS), Radiotelevisione svizzera (RSI) e Radiotelevisiun Svizra Rumantscha (RTR) ina pli gronda cumpart dals meds.
La SSR impunda las taxas da recepziun unicamain per la purschida da program, a la quala l'interpresa è obligada tenor il mandat da prestaziun.
Gulivaziun da finanzas 2011 tenor regiun linguistica
Programs naziunals
Cun programs interregiunals promova la SSR la chapientscha vicendaivla tranter las cuminanzas linguisticas e culturalas: ina gruppa d'experts evaluescha projects che correspundan als basegns communabels da las unitads da radio e televisiun ed a l'incumbensa da la SSR. Ils projects interregiunals realisads derivan dals secturs infurmaziun, divertiment u cultura. Questas producziuns preschentan la Svizra da differents puncts da vista. P.ex. cun las emissiuns da «SCIENCEsuisse» – 25 films curts davart il mund da la scienza e da la perscrutaziun – emessas il 2008 ed il 2009 ubain ils onns avant cun las serias «PHOTOsuisse», «LiteraTour de Suisse», «ArchitecTour de Suisse» u «Svizra misteriusa». Pli e pli savens vegnan era transmess sin plaun naziunal occurrenzas da sport ed emissiuns da divertiment.
Migraziun, integraziun e diversitad culturala
Las medias èn acturs impurtants en il process d'integraziun da migrants. Perquai s'occupa la SSR en ses programs da radio e televisiun cuntinuadamain dals pregiudizis da la diversitad culturala. Era l'European Broadcasting Union (EBU) sa deditgescha dapi intgins onns a quest tema ed ha organisà divers congress respectivs. La SSR prenda part a discussiuns ed ha elavurà en quest rom las basas per l'emprima emna tematica en l'istorgia da l'interpresa. Sut il titel «Wir anderen – nous autres – noi altri – nus auters» è vegnì documentà, analisà e discutà il tema «Integraziun e migraziun» la primavaira 2008 en tut las quatter parts dal pajais ed en tut ils formats. Ultra da quai è la SSR partenaria da cooperaziun da las suandantas instituziuns internaziunalas:
- CIVIS Fundaziun da medias: La fundaziun sensibilisescha schurnalists en Germania ed en l'Europa per temas da l'integraziun e da la diversitad culturala, ed ella premiescha emissiuns che sa fatschentan a moda extraordinaria cun quests temas.
- BaKaFORUM: Il «Basel Karlsruhe Forum» è ina fundaziun che promova reportaschas davart temas da furmaziun e da svilup en las medias audiovisualas, sco er il barat e la coproducziun tranter ils emetturs da televisiun dal nord e dal sid.
Televisiun senza barrieras
I dat umans ch'èn dependents da meds d'agid per pudair consumar emissiuns da televisiun. Quai èn p.ex. persunas cun ina flaivlezza da la vesida u da l'udida, però er umans che n'han sin fundament da lur enconuschientschas manglusas da la lingua nagin access direct ad emissiuns da televisiun. Per meglierar l'integraziun communicativa da las persunas pertutgadas offra la SSR differents servetschs:
Suttitels: Dapi il 2010 èn disponibels per regla tranter las 19.00 e las 22.00 (primetime) suttitels per l’entir program sco era per tut las occurrenzas emessas en directa la fin d’emna a partir da mezdi. Dapi la fin dal 2009 èn disponibels suttitels per in terz da las emissiuns da mintga regiun linguistica.
Lingua da segns: SRF, RTS e RSI emettan mintga di dapi il schaner 2008 in’ediziun da la «Tagesschau» cun la lingua da segns.
Descripziun auditiva: Grazia a la descripziun auditiva – ina descripziun acustica cuntinuada dal film – pon persunas impedidas da vesida seguir l’istorgia. L’onn 2010 devi gia 24 producziuns en mintga regiun linguistica.
Engaschi umanitar
La SSR considerescha la solidaritad tranter las maioritads e minoritads sco ina premissa impurtanta per pudair ademplir si'incumbensa. Per quest motiv demussa ella era solidaritad, cura ch'i va per fatgs umanitars.
- Chadaina da fortuna: La Fundaziun Chadaina da fortuna da la SSR rimna dapi il 1946 donaziuns per umans en miseria. Perquai che la Chadaina da fortuna n'è sezza nagina ovra d'agid, realiseschan var 30 ovras d'agid partenarias ch'èn accreditadas en Svizra las acziuns operaziunalas. Ils daners da la Chadaina da fortuna èn suttamess a trais controllas da finanzas. Uschia è la Chadaina da fortuna ina da las fundaziuns controlladas il meglier en Svizra. L'onn 2008 è la Chadaina da fortuna s'engaschada en 270 projects en 51 pajais cun ina summa totala da 206,4 milliuns francs. L'acziun da collecta enfin ussa la pli gronda ha gì lieu l'entschatta dal 2005 a favur da las unfrendas dal tsunami ed ha realisà in retgav da 227 milliuns francs. SR DRS emetta mintga dumengia a las 9.45 (DRS 1) l'emissiun da tschintg minutas «Glückskette aktuell».
- «2 x Nadal»: Mintgamai vers la fin da l'onn realisescha la SSR en collavuraziun cun la Crusch Cotschna Svizra e La Posta in'acziun da collecta caritativa sut il titel «2 x Nadal». La populaziun svizra vegn intimada da far in plaschair cun in pachet da regal a persunas dischavantagiadas en Svizra u a l'exteriur. «2 x Nadal» è vegnì organisà il 2010 gia per la 14avla giada.
- «Denk an mich»: «Denk an mich» è ina fundaziun da SR DRS ch'exista dapi il 1968. La fundaziun offra cun dus fin trais milliuns per onn a passa 10 000 persunas cun in impediment vacanzas ed activitads dal temp liber. Passa 50 000 persunas, uniuns e firmas en Svizra han contribuì fin ussa var 60 milliuns francs. Mintga sonda en damaun infurmescha in'emissiun da radio davart acziuns spezialas a favur da la fundaziun.
- «mitenand»: L'emissiun «mitenand» da SF rapporta mintg'emna en reportaschas curtas davart problems da la sanadad, da la miseria sociala e da l'ambient en Svizra ed en il terz mund. Ils rapports illustreschan a maun da persunas pertutgadas co che las organisaziuns d'agid privatas reageschan sin questas sfidas. Dapi l'entschatta da l'onn 2005 stat «mitenand» sut il patrunadi da la SSR e vegn er emess sin RTS («ensemble») e RSI («insieme»).
