Aktuelle Position
Derasaziun
La SSR producescha ed emetta programs. Per pudair ademplir en scadin cas si'incumbensa da distribuziun, dispona ella d'ina infrastructura cumplexa.
Il provediment da basa per radio e televisiun
Igl è pussaivel da retschaiver programs da radio e televisiun SSR en pliras modas. Uschia è garantì in provediment da quasi 100 pertschient da las chasadas en Svizra.
Tant tar il radio sco era tar la televisiun profita il public da novas tecnologias e lur qualitads. La SSR promova perquai la modernisaziun da radio e televisiun ed investescha en l'avegnir digital dals dus mediums, p.ex. cun la televisiun ad auta resoluziun (HDTV u Dolby Digital) u cun il radio senza disturbis (Digital Audio Broadcasting, DAB).
Il radio
| A moda terrestra | Retschaiver programs da la SSR via in'antenna da chasa, da chombra u da l'auto: DAB (Digital Audio Broadcasting) – la recepziun digitala: per tut ils programs da l'atgna regiun linguistica ed ils emprims programs da las autras regiuns linguisticas. Ultra da quai èn disponibels tut tenor regiun linguistica differents pachets da programs digitals. La finamira è da sviluppar vinavant DAB ils proxims onns en DAB+. L'avantatg: cun la medema infrastructura sa laschan derasar per emettur prest duas giadas uschè blers programs. Undas ultracurtas – la recepziun analoga: per ils programs da l'atgna regiun linguistica sco era per ils emprims programs da las autras regiuns linguisticas. Undas medias – la recepziun analoga: per il program Option Musique; era quel program pon ins recepir a partir dal 2011 mo pli via DAB, perquai che l'emettur Sottens vegn mess ord funcziun. |
| Via cabel | Igl è pussaivel da retschaiver almain ils programs da la SSR da l'atgna regiun linguistica, sco er ils emprims programs da las autras regiuns linguisticas. |
| Via satellit | Permetta da recepir a moda digitala tut ils 18 programs da la SSR via Hotbird dad Eutelsat. |
| Via Internet | Igl è pussaivel da retschaiver tut ils 18 programs sco live stream da las singulas interpresas da radio da la SSR. |
La televisiun
| A modaterrestra | DVB-T (Digital Video Broadcasting – Terrestrial), la recepziun digitala en tut la Svizra: retschaiver pon ins mintgamai ils programs da la SSR da l'atgna regiun linguistica, ils emprims programs da las regiuns d'ina autra lingua, sco er en la Svizra tudestga e rumantscha il program da repetiziun SRF info. |
| Via cabel | SRF 1, SRF zwei, SRF info, RTS Un, RTS Deux, RSI LA 1, RSI LA 2 (en Svizra tudestga). |
| Via satellit | Permetta da recepir 7 programs da la SSR (SRF 1, SRF zwei, SRF info, RTS Un, RTS Deux, RSI LA 1, RSI LA 2) via Hotbird dad Eutelsat. Questa moda da recepziun vegn pli e pli populara. Perquai ch'ils programs da televisiun via satellit ston vegnir emess a moda codada per motivs dal dretg da licenza e dal dretg d'autur, dovri ina carta SatAccess per retschaiver ils programs da televisiun da la SSR. |
| Via internet | Via la pagina web dals singuls programs da televisiun da la SSR pon ins guardar numerusas emissiuns da tuttas uras sco stream. Grazia a differents purschiders (p.ex. Wilmaa e Zattoo) e cun agid d'in player da software pon ins guardar ils programs da la SSR al monitur dal computer. |
| Via IPTV | Internet Protocol Television: las datas vegnan transmessas cun il protocol d'internet (IP): retschaiver pon ins tut ils programs da la SSR; ultra da quai stattan a disposiziun tut tenor regiun linguistica differents pachets da programs digitals. |
Il provediment da basa en situaziuns da crisa
Grazia a la structura d'ina interpresa naziunala po la SSR infurmar la populaziun er en situaziuns extraordinarias. Sch'igl è necessari da dar a la populaziun directivas da cumportament concretas, pon las autoritads instradar ina annunzia d'alarm (sistem d'infurmaziun Icaro). En cas d'ina gronda crisa è la SSR l'organ d'infurmaziun uffizial dal Cussegl federal. Cunvegnas da prestaziun segireschan ch'il Cussegl federal po sa drizzar da tut temp a la populaziun. Per quest intent dispona la SSR d'ina rait d'emetturs d'urgenza: sch'ella n'è betg pli capabla da producir e d'emetter ses programs regulars, fan ses schurnalists e tecnicists in program da radio d'urgenza en trais linguas sut la responsabladad directa da la Confederaziun.
Differentas modas d'utilisar las medias
La digitalisaziun transfurma er en Svizra las disas ed ils basegns dals consuments da medias:
- Purschidas multimedialas en l'internet permettan da satisfar meglier als interess spezials ch'il provediment usità.
- Apparats multifuncziunals sco il computer u il telefonin èn surtut per il public giuven ina plazza da martgà per purschidas da tun, maletg e text ch'els pon dumandar giu independentamain dal lieu e dal temp.
- Il consum da radio linear dals giuvenils sa sminuescha cuntinuadamain. Ils radios da la SSR sa fan però valair meglier che lur concurrents. Grazia a la pussaivladad da tadlar radio da tuttas uras (podcasts, radio on demand) u entras il consum da radio via internet gudogna la SSR novs auditurs.
- L'internet è pli e pli indispensabel per pudair ademplir ils basegns dal public da televisiun. La rait permetta numnadamain in consum da televisiun adattà a las preferenzas individualas e deliberescha ils consuments dal dictat dals temps d'emissiun fixs.
La purschida multimediala da la SSR è la resposta a la midada che stgaffescha d'in cuntin novas tecnologias e che marchescha il cumportament dal public. Ditg curtamain: La SSR resguarda damai il consum da medias sa midà e cuntanscha adina meglier la nova generaziun da medias.
Videos: Service public für die Schweiz
Links
- Broadcast
Informationen zu Verbreitung und Empfang der Radio- und Fernsehprogramme der SRG - Alarm da sirenas Icaro
