Service public

Pacte de l'audiovisuel

La SSR realisescha sia incumbensa culturala cun differentas mesiras. In’impurtanta pitga da la promoziun culturala – almain finanzialmain la pli ferma – è la promoziun dal film. Suenter che tant la SSR, sco er ils represchentants dal film han considerà onns a la lunga l’obligaziun legala da promover il film plitost sco in duair che sco ina schanza, ha questa barriera pudì vegnir eliminada il 1996 cun il Pacte de l’audiovisuel. La SSR e tschintg partenaris da la branscha da film (oz set) han creà ina plattafurma cun la finamira d’augmentar la preschientscha e la qualitad dal film svizzer. Ils partenaris èn l’Associaziun svizra dals producents da films (SFP), l’Associaziun svizra reschia e scenari da film (ARF), la Gruppa svizra dal film d’animaziun (GSFA), il Forum Romand, l’Associaziun Swissfilm, la Gruppa auturs, reschissurs, producents (GARP) e la Cuminanza d’interess dals producents da films svizzers independents (CI).

Il schaner 2012 han la SSR e ses partenaris dal Pacte de l’audiovisuel suttascrit il nov Pacte de l’audiovisuel 2012-2015. Cun quel s’oblighescha la SSR dad investir circa 90 milliuns francs en l’industria cinematografica naziunala per ils proxims quatter onns. Ella coproducescha mintg’onn en tut il pajais passa 200 films da kino, films da televisiun, films documentars e films d’animaziun sco era serias en il rom dal Pacte de l’audiovisuel. La cuntinuitad da ses engaschament ha gidà ils ultims onns considerablamain a professiunalisar la branscha da films svizra. La promoziun da films sco lavur culturala è ina pitga da la SSR. Il directur general da la SSR Roger de Weck: «Il film svizzer è in spievel da la Svizra ed in spievel svizzer dal mund. Dal service public fa part ord persvasiun l’engaschament massiv en favur dals reschissurs e producents indigens: dapi l’existenza da la cunvegnientscha ha la SSR investì dapli che 275 milliuns francs en la branscha da films svizra. La SSR na rapporta betg mo da la cultura, ella pussibilitescha era cultura». La prolungaziun dal Pacte de l’audiovisuel per quatter onns rinforza la stretga collavuraziun.

En il nov Pacte vegn vinavant fatg la differenza tranter la promoziun selectiva e la promoziun automatica. Per la promoziun selectiva stattan mintg’onn a disposiziun circa 18 milliuns francs, da quels èn previs indesch milliuns per producziuns da televisiun e set milliuns per la coproducziun da films da kino. Uschia vegn augmentada la summa da contribuziuns per las producziuns da televisiun per trais milliuns francs. Sco cuntramesira reducescha l’Uffizi federal da cultura ses meds selectivs ch’èn fin ussa reservads per sias producziuns da televisiun ed alimentescha uschia la promoziun da films dependenta dal success ch’è vegnida extendida fermamain.

Da nov vegnan sustegnidas en il Pacte de l’audiovisuel era producziuns da multimedia independentas. Il diever e la producziun da cuntegns audiovisuals èn sa midads fermamain durant ils ultims onns causa las novas tecnologias da medias: ils films na vegnan ozendi betg pli producids mo per il kino u per il monitur, mabain era per l’utilisaziun sin il smartphone u concepids e realisads per l’internet. Cun la nova promoziun tegna la SSR quint da quest svilup sin il champ audiovisual.

La promoziun dependenta dal success vegn era extendida e prevesa dus instruments: ultra da la distincziun «Succès Passage Antenne» che premiescha l’emissiun da films sin ils chanals da la SSR, vegn surdà da nov er il premi «Succès Artistique» per films artistics da buna qualitad. Ils films svizzers che pon vegnir preschentads a festivals naziunals ed internaziunals impurtants e che vegnan forsa premiads là, pon profitar da questa promoziun culturala.

La SSR che resguarda las finamiras da qualitad dal service public, sa posiziunescha vinavant sco partenaria activa da la branscha. Dapi il 1998 ha ella investì bunamain 300 milliuns francs en il rom dal Pacte. Quest sustegn da la SSR ha permess da realisar gia passa 2000 films da televisiun, films documentars, films curts e films d’animaziun.