Aktuelle Position
Cultura
En ses programs da radio e televisiun renda la SSR perceptibla la cultura. Cun contribuziuns da promoziun u sco partenaria d'occurrenzas s'engascha ella activamain per la lavur culturala en Svizra.
La concessiun determinescha ch'ils programs da radio e televisiun da la SSR e si'ulteriura purschida publicistica duain contribuir al svilup cultural ed al rinforz da las valurs culturalas dal pajais – resguardond en spezial la litteratura, la musica e la lavur cinematografica svizra. La cultura è per la SSR dentant dapli ch'ina obligaziun legala: ella s'engascha era sper ses programs da radio e televisiun vastamain per ils interess culturals.
La cultura en il radio e la televisiun
En ils 18 programs da radio ed ils 7 programs da televisiun renda la SSR perceptibla la cultura mintga di. En il radio s'occupan surtut ils segunds programs da la cultura: en la Svizra tudestga DRS 2, en la Svizra romanda Espace 2 ed en la Svizra taliana Rete Due. Quests emetturs transmettan programs cun infurmaziuns approfundadas davart la musica, la litteratura ed il film.
La cumpart dals cuntegns da program culturals en il radio ha muntà il 2008 a var sis pertschient; questas datas na cumpiglian dentant betg la quota da musica emessa. Per cumparegliar: la cumpart da la pli impurtanta sparta, novitads ed infurmaziun, ha importà l'onn 2008 enturn 16 pertschient en il radio.
Er ils programs da televisiun da la SSR deditgeschan ina buna part da lur temp d'emissiun a la cultura cun emissiuns emnilas spezialas. Da menziunar èn surtut era producziuns da televisiun singularas sco «La Traviata im Hauptbahnhof» dal 2008 ubain «La Bohème im Hochhaus» dal settember 2009 – omaduas inscenaziuns han purtà ina represchentaziun culturala sin il televisur a chasa. E cun las emissiuns «PHOTOsuisse», «LiteraTour de Suisse» u «ArchitecTour de Suisse» ha la SSR preschentà la cultura da differents puncts da vista.
La quota da cuntegns culturals en la televisiun ha importà il 2008 stgars 14 pertschient. Per cumparegliar: la cumpart da la pli impurtanta sparta, novitads ed infurmaziun, ha muntà l'onn 2008 a var 28 pertschient.
Radios ch'emettan exclusivamain musica
La gronda part dals programs da radio da la SSR èn programs maschadads cun contribuziuns da pled e da musica. DRS 4 News è schizunt in program da pled da 24 uras. Daspera datti però er anc radios da la SSR ch'emettan exclusivamain musica u plattafurmas da musica che promovan e rendan enconuschenta la musica svizra:
- Swiss Satellite Radio 2010:
- Radio Swiss Classic: 148 000 auditurs per di
- Radio Swiss Jazz: 73 000 auditurs per di
- Radio Swiss Pop: 275 000 auditurs per di
- www.mx3.ch: «The Swiss Music Portal» è ina plattafurma da DRS 3, DRS Virus, Couleur 3, Rete Tre e Radio Rumantsch. Sin quella pon musicists preschentar lur ovra a la publicitad ed ils radios menziunads integreschan ina part da questas chanzuns en lur program. L'atun 2009 avevan 12 200 bands registrà lur musica sin quel portal che vegn visità en media da 100 000 persunas per mais.
- www.vxm.ch: «Il portal da la musica populara svizra» da DRS Musikwelle, La Première, Rete Uno e Radio Rumantsch è ina plattafurma, sin la quala s'inscuntran musicists, experts, fans, uniuns ed organisaturs d'occurrenzas da musica populara. L'atun 2009 eran preschentas sin quest portal bundant 630 furmaziuns da musica.
La promoziun dal film
Films èn ambassadurs da la diversitad culturala e linguistica. In'impurtanta pitga da la promoziun culturala è perquai la promoziun dal film da la SSR: l'onn 1996 ha ella creà ensemen cun partenaris da la branscha da film il Pacte de l’audiovisuel. Dal 1997 fin il 2011 ha la SSR investì stgars 300 milliuns francs en la promoziun dal film (2012: 22,3 milliuns francs). Grazia al Pacte han pudì vegnir producids ils ultims 15 onns passa 2000 films da kino e da televisiun, dissegns animads, films curts e films documentars. Ils ultims 5 onns han ils programs da televisiun da la SSR coproducì 763 suandants films:
La SSR sustegna en il rom da partenadis da medias ils suandants impurtants festivals svizzers da film:
- Dis da film da Soloturn (schaner)
- Premi dal film svizzer (mars)
- Visions du Réel Nyon (avrigl)
- Festival da films da Locarno (avust)
- Cinéma Tous Écrans, Genevra (settember)
- Festival dals films curts da Winterthur (november)
La promoziun da la musica
La musica è per il radio quai ch'il film è per la televisiun. La SSR ha concretisà ses sustegn a favur da la musica svizra en la Charta da la musica svizra, suttascritta il 2004 cun ils represchentants dal mund da la musica. La Charta ha la finamira da promover la musica svizra e musicists talentads. Cun signar la Charta s'oblighescha la SSR dad emetter en ses programs ina quota commensurada da producziuns naziunalas. Sco musica svizra valan registraziuns e transmissiuns en directa cun cumponists, interprets u producents svizzers, sco era registraziuns cun ina gronda participaziun svizra. Ils partenaris da la SSR fixeschan mintg'onn valurs directivas areguard la preschientscha da la musica svizra en lur programs. Ils ultims onns n'ha la SSR betg mo cuntanschì, mabain schizunt superà la gronda part da quellas.
Mintga dus onns ha lieu a Losanna il festival da musica «Label Suisse» che vegn organisà primarmain da Radio Suisse Romande (RSR). Il festival, ch'è vegnì realisà l'emprima giada il 2004, ha il scopo da promover la musica svizra. Dapi l'onn 1980 organisescha medemamain RSR mintga dus onns la «Schubertiade» – in grond festival da musica classica organisà adina en in auter lieu en la Svizra romanda.
La SSR promova la musica era cun concerts ed occurrenzas da pop, rock, jazz e classica. Il 2009 existivan per quest motiv passa 50 partenadis da medias musicals, sco p.ex. Rock’n’Roll & Edelweiss, Swiss Music Award, Zoogä-n-am Boogä, Cully Jazz, Musikantenstadl, Festa da chant districtuala, Montreux Jazz Festival, Menuhin Festival Gstaad, Open Air Lumnezia, Alpentöne, AVO Session Basel ubain musicals sco Mamma Mia, Moulin Rouge e West Side Story.
La promoziun da la litteratura
- Radio e televisiun: La SSR promova regularmain la litteratura en ses programs da radio e televisiun, saja quai cun emissiuns sco «Buchzeichen» u «Hörbar» sin DRS 1, «Literaturclub» sin SF, «Entre les lignes» sin Espace 2, «Furbo chi legge» sin Rete Uno u «Preziosa litterara» sin Radio Rumantsch. Talas transmissiuns, prelecziuns u gieus auditivs envidan il public da leger ed han effects positivs per il martgà da cudeschs svizzer.
- Dis da litteratura da Soloturn: En il rom d'in partenadi da medias sustegna la SSR dapi l'atun 2007 ils Dis da litteratura da Soloturn – il pli impurtant forum per la litteratura svizra.
- Di internaziunal dal cudesch: Questa occorrenza ha l’intent d’attrair l’attenziun dal public sin il cudesch sco bain cultural e da promover la lectura. Dapi il 2005 festivescha la Svizra quest di cun passa 500 occurrenzas en bibliotecas, librarias e lieus publics. «La Svizra legia. Ti era?» è il slogan da quest eveniment che vegn realisà sut il patrunadi da la SSR ed organisà cun la «Lobby svizra dal cudesch».
- Salon du livre: A chaschun dal «Salon du livre 2010» ha TSR surdà per la sisavla giada il «Prix TSR littérature Ados» – il sulet premi per litteratura franzosa destinà en emprima lingia a giuvenils en la vegliadetgna da 14 fin 16 onns (www.liredelire.ch).
