Il Museum Svizzer da Transports a Lucerna festivescha il 2009 ses giubileum da 50 onns. En vista a questa occasiun ha la SSR remplazzà il studio da radio e televisiun en il Museum Svizzer da Transports, che exista gia dapi passa in tozzel onns, entras ina plattafurma multimediala, la nova «Media Factory» – ina fabrica moderna da medias e da savida. Giuven e vegl ha la chaschun da prender invista dal studio da radio e televisiun, da far contribuziuns per las novitads e da las moderar sez, da simular intervistas e da sincronisar material da tun e da maletg. 

La «Media Factory» è ina plattafurma che permetta da s’occupar persunalmain cun las novas medias e las tecnologias actualas. Ella mussa cun tge hard- e software che lavura ozendi in’interpresa da medias electronica moderna sco la SSR per pudair ademplir las diversas pretaisas dal public da radio e televisiun. Las visitadras ed ils visitaders dal Museum Svizzer da Transports duain avair la chaschun da vesair cun agens egls tge premissas che quai pretenda tut.

La «Media Factory» sa drizza a tut las visitadras ed a tut ils visitaders dal Museum Svizzer da Transports a Lucerna. Ella è però er in champ d’experiment ideal per scolas ed universitads che vulan render pli famigliaras a lur studentas ed a lur students las correlaziuns en la producziun da las medias electronicas. En pli è la «Media Factory» er adattada per occurrenzas dal sectur da medias. L’equipament tecnic da la «Media Factory» permetta damai da producir e d’emetter emissiuns da radio e televisiun en qualitad professiunala.

Faschai Voss’atgna emissiun e surprendi cun quella Vossa famiglia e Voss amis. Bun divertiment!