SRG SSR

  • DE
  • FR
  • IT
  • RM
  • EN
Radiotour 2010: Swissness en l’Africa dal Sid

Communicaziun da pressa

31.05.2010

Radiotour 2010: Swissness en l’Africa dal Sid

Dals 7 da zercladur fin il gieu d’avertura dal campiunadi mundial da ballape ils 11 da zercladur 2010, emettan il Radio Rumantsch, Schweizer Radio DRS 1, RSR La Première e RSI Rete Uno en directa dal quartier da l’equipa naziunala svizra a Vanderbijlpark. Ils quatter emprims programs da radio da la SRG SSR e swissinfo preparan la Svizra sin l’atmosfera dal campiunadi mundial en l’Africa dal Sid.

A la Radiotour da quest onn, che porta il titel «RadioSüdafrika. RadioSuissafrica. RadioSudafrica. RadioSidafrica», participescha per l’emprima giada era swissinfo. La plattafurma da multimedia da la SRG SSR publitgescha in dossier online cun texts e maletgs multifars che cumplettescha la purschida dals radios.

L’Africa dal Sid ord vista da las Svizras e dals Svizzers

En il center da tut las contribuziuns stat la Swissness resp. las interpresas, organisaziuns e persunas svizras ch’èn sa domiciliadas en la Republica da l’Africa dal Sid ed èn là activas sin divers secturs. Discurrì vegn davart las relaziuns economicas e commerzialas, il turissem, la societad, la cultura e la politica – e tematisadas vegnan tant las varts legraivlas, sco era quellas main ludaivlas, sco per exempel la rolla suspectusa da la Svizra durant l’apartheid. En l’Africa dal Sid vivan oz passa 9’000 Svizras e Svizzers. Il Radio Rumantsch, DRS 1, La Première, Rete Uno e swissinfo raquintan en intervistas cun giasts en il studio, en purtrets e reportaschas interessantas da quest pajais dal campiunadi mundial da ballape, che vegn era numnà pajais da l’artg s. Martin sin fundament da sias numerusas fassettas. 

Diversitad grazia a la cooperaziun

En il rom dal 10avel project interregiunal furman ils quatter emprims programs da radio puspè ina redacziun communabla plurilingua. Questa squadra vegn a porscher a las audituras ed als auditurs ina seria d’emissiuns culturalas multifaras. Ultra a quai pon las redacturas ed ils redacturs profitar dals contacts e da las retschertgas da lur collegas e dal barat d’ideas e da savida. Betg mo il persunal redacziunal, mabain er il persunal tecnic lavura durant la Radiotour maun en maun. Uschia vegnan las sinergias ed ils meds disponibels nizzegiads a moda optimala.

Infurmaziuns detagliadas davart il project: http://www.radiotour.ch/www.radiotour.ch
<//a>Illustraziuns per las medias: http://www.radiotour.ch/rm/2010/medias.htmlwww.radiotour.ch/rm/2010/medias.html<//a>

Ulteriuras infurmaziuns survegnis Vus da:
Niculin Bezzola, manader da project SRG SSR, tel. 079 686 49 92, niculin.bezzola(at)rtr.ch

Communicaziun d’interpresa da la SRG SSR idée suisse

RSIRTRRTSSRFSWI