SRG SSR

  • DE
  • FR
  • IT
  • RM
  • EN
Perfuraziun dal tunnel da basa dal Gotthard: la SRG SSR rapporta en directa or da la muntogna

Communicaziun da pressa

15.09.2010

Perfuraziun dal tunnel da basa dal Gotthard: la SRG SSR rapporta en directa or da la muntogna

Ils 15 d’october 2010 vegn perfurà l’ultim tschancun dal tunnel da basa dal Gottard tranter Faido e Sedrun. Cun ses 57 km è el il pli lung tunnel dal mund. Las medias da la SRG SSR idée suisse accumpognan quest eveniment istoric e permettan uschia a la populaziun svizra da participar a quel grond mument via radio, televisiun ed internet. Avant e durant il di da la perfuraziun documenteschan ils programs da la SRG SSR en tut las regiuns linguisticas la construcziun dal tunnel cun rapports detagliads, intervistas e reportaschas en directa extendidas.

Ils 15 d’october da quest onn vegnan las maschinas en il tunnel da basa dal Gottard a perfurar l’ultim tschancun dal tunnel da l’ost – magari precis indesch onns suenter ch’ins ha cumenzà cun las lavurs da perfuraziun ils 4 da november 1999. La fin dal 2017 duain alura ils emprims trens da vitgira e da persunas filar cun fin a 250 kilometers l’ura tras il tunnel, distgargiar las vias e reducir considerablamain ils temps da viadi.

La perfuraziun è in term impurtant en l’istorgia da quest project da traffic relevant per l’Europa. Mo 200 giasts envidads han l’onur d’esser perditgas da quella directamain en il tunnel. Ils programs da radio e televisiun da la SRG SSR fan tut lur pussaivel che era la populaziun svizra possia persequitar quest eveniment istoric a l’intern da la muntogna – e quai en la meglra qualitad da HD e da tun. Per esser preparà per eventuals incaps tecnics vegn la TPC, ina societad affiliada da la SRG SSR, a metter l’entschatta d’october a l’intern da la muntogna dus cabels da fibra da vaider fabritgads spezialmain: quels èn 6.5 kilometers lungs, paisan mintgin 250 kilograms e surmuntan per part pendenzas verticalas. Per l’unitad d’interpresa Swissinfo e per il live-streaming vegnan installadas ulteriuras lingias da datas. Otg cameras vegn la SRG SSR ad installar en il tunnel, ina da quellas sa chatta directamain sin la maschina da perfurar.

Ils programs da radio e televisiun ed era lur portals d’internet rapportan detagliadamain davart il tunnel da record. Var 40 uras en directa èn deditgadas a la perfuraziun ed a tut ils acts festivs. A Sedrun han las staziuns da radio e da televisiun da tut las quatter regiuns linguisticas mintgamai in char da transmissiun e produceschan directamain al lieu lur program. Dasperas vegnan emessas bleras infurmaziuns supplementaras davart la significaziun internaziunala, naziunala e regiunala dal tunnel. Era Swissinfo deditgescha a quest eveniment in «special» cun elements multimedials en otg linguas. HD suisse transmetta integralmain il program da SF davart la perfuraziun dal Gottard en auta qualitad da tun e maletg.

Infurmaziuns detagliadas davart il program da radio e da televisiun da la SRG SSR e da Swissinfo chattais Vus sut:  

Communicaziun d’interpresa da la SRG SSR idée suisse
Daniel Steiner, pledader da medias, tel. 079 827 00 66

RSIRTRRTSSRFSWI