SRG SSR

  • DE
  • FR
  • IT
  • RM
  • EN
Segunda ediziun dal premi Pacte Multimédia: premiaziun dals victurs a Genevra

Communicaziun da pressa

28.10.2008

Segunda ediziun dal premi Pacte Multimédia: premiaziun dals victurs a Genevra

Suenter Berna ha quest onn Genevra l’onur dad esser il lieu ospitant per la segunda surdada dal premi “Pacte Multimédia” da la SRG SSR idée suisse e da ses partenaris. Quest premi che vul promover l’innovaziun en il sectur da las novas tecnologias d’infurmaziun chatta buna accoglientscha, sco quai che la gronda participaziun da persunas da tut la Svizra e da l’exteriur demussa. La giuria ha decis da premiar quest onn trais projects; dus projects survegnan mintgamai CHF 40’000.- ed in project vegn undrà cun il premi da promoziun da CHF 10’000.-. Ils premis vegnan surdads questa saira en il rom dal Festival Cinéma Tous Ecrans da la Télévision Suisse Romande e da sia nova partiziun da multimedia en preschientscha d’Armin Walpen, il directur general da la SSR SRG, e da Mauro Dell’Ambrogio, il secretari da stadi per furmaziun e perscrutaziun. La premiaziun è era in’occasiun da preschentar il svilup dals projects premiads l’onn 2007 e da mussar las midadas da la pagina Web www.pactemultimedia.ch che rimna tut las contribuziuns da la SRG SSR deditgadas a las novas tecnologias.

Il premi “Pacte Multimédia” e la pagina d’Internet èn parts essenzialas dal “Pacte Multimédia” suttascrit la primavaira 2007 da la SRG SSR e da ses partenaris: il Secretariat da stadi per furmaziun e perscrutaziun (SFP), l’Uffizi federal da furmaziun professiunala e da tecnologia (UFFT) e la Conferenza svizra dals directurs chantunals da l’educaziun publica (CDEP). La finamira da quest partenadi è d’in maun da s’engaschar ensemen per promover l’innovaziun e la retschertga scientifica applitgada en il sectur da las medias e da la furmaziun, e da l’auter maun da dar a mintgin la pussaivladad da sa famigliarisar cun il mund digital.

Ils victurs dal premi 2008 dotà cun mintgamai CHF 40'000.- èn:

Stéphane Doutriaux per ses portaclavs POKEN, ina carta electronica che collia il mund real cun il mund virtual grazia al barat d’infurmaziuns. Il portaclavs ha la furma dad in umet cun mauns surdimensiunads ed el permetta a dus utilisaders da sa chattar facilmain sur l’Internet. Sche dus pokens sa tutgan, barattan els via undas radiofonicas in code ch’identifitgescha ils proprietaris. Il poken da la grondezza d’ina clavetta USB sincronisescha, apaina collià cun Voss computer, Voss contacts ed As permetta d’als visualisar sin las paginas d’Internet che Vus vulais. Il poken n’è betg mo in portaclavs innovativ e patentà, mabain era ina plattafurma averta per organisar Voss contacts: el po communitgar cun diversas applicaziuns en l’Internet ed en raits privatas d’interpresas.

Mailto:stephane(at)doyoupoken.com

www.doyoupoken.com

Tel: 079 / 394 70 91

Raphael Briner per sia pagina Web HyperWeek, ina plattafurma per publitgar, edir e distribuir cuntegns en spazis collectivs persunalisabels e modulars. HyperWeek è ina constellaziun da blogs multimedials, en ils quals mintgin è envidà da discutar davart temas da la professiun u davart actualitads. Tranter las novaziuns vegn ins spert a chattar la vaira surfatscha; cun in pitschen utensil grafic po mintgin crear in attirasguard per marcar ina gruppa. I sa dat ina sort da kiosc placativ, nua che titels e colurs procuran per in’atmosfera allegra. Grazia a sia flexibilitad ed efficacitad vegnan blers a chattar en HyperWeek in instrument per crear spert ina micro-communitad u per survegnir sustegn per lur activitads.

Mailto:raphael(at)hyperweek.com

www.hyperweek.com

Tel: 076 / 581 67 21

Il victur dal premi da promoziun dotà cun CHF 10'000.- è:

Dominique Dirlewanger per ses project Memorado, memoria ed istorgia orala en Svizra. Quest project naziunal e pedagogic è concepì enturn in cudesch betg edì ed ina pagina d’Internet che permetta a giuvnas e giuvens da documentar fatgs istorics. Cun agid d’in tunnel cronologic en trais dimensiuns e da fischas curtas scrittas dal team da Memorado vegnan ils giuvens intimads da far intervistas curtas davart fatgs istorics cun lur geniturs, tats, u auters creschids ch’èn perditgas d’in eveniment istoric. Cun suandar las instrucziun da diever dumondan ils “emprendists” d’istorgia l’autorisaziun da las persunas intervistadas da dastgar publitgar lur contribuziuns e redigian in catalog da dumondas per l’intervista. Cun agid da lur telefonin fan ils giuvens alura in video u prendan si ina datoteca auditiva davart il tema istoric, dal qual la persuna intervistada è stada perditga.

Mailto:dominique(at)dirlewanger.ch

Tel: 079 / 507 20 74

La giuria sa cumpona da persunalitads dals secturs da las tecnologias d’infurmaziun, da la furmaziun e da las medias:

Andrea Basso, prof., perscrutader tar AT& Labs, Middletown, USA
Adrienne Corboud, vicepresidenta per la valurisaziun e l’innovaziun a la SPFL, Renens
Anton Gunzinger, prof. SPF, CEO Supercomputing systems AG, Turitg
Nicolas Henchoz, directur da l’Institut SPFL-ECAL Lab, Renens
Walter Bachmann, responsabel per multimedia da la Televisiun Svizra, Turitg
Gilles Marchand, directur TSR, Genevra (president)
Hans-Peter Schwarz, professur e docter a la Scola auta d’art,  ZHdK, Zürich

La plattafurma www.pactemultimedia.ch

Il portal quadriling www.pactemulitmedia.ch rimna las contribuziuns da radio e televisiun dals emetturs da la SRG SSR deditgadas a las novas tecnologias d’infurmaziun. El permetta dad entrar en il mund da la digitalisaziun e da sa famigliarisar cun las tecnologias dominantas. Il vast spectrum da temas preschenta ed explitgescha era las ultimas novaziuns.

Contacts:

Gilles Marchand, Directeur Télévision Suisse Romande, Tél. 022 708 85 51
Solveig Sautier, Coordinatura dal „Pacte Multimédia“, Tel. 079 701 94 33
Daniel Steiner; Pledader da la SRG SSR idée suisse, Tel. 079 827 00 66

RSIRTRRTSSRFSWI