SRG SSR

  • DE
  • FR
  • IT
  • RM
  • EN
«SCIENCEsuisse» - Plazza da perscrutaziun Svizra en il focus dals programs da televisiun SRG-SSR

Communicaziun da pressa

23.10.2008

«SCIENCEsuisse» - Plazza da perscrutaziun Svizra en il focus dals programs da televisiun SRG-SSR

Oz lantscha la SRG SSR idée suisse cun ina vernissascha a Berna la retscha da 25 films curts «SCIENCEsuisse», che maina en il mund fascinant da las scienzas e purtretescha perscrutadras e perscrutaders da diversas disciplinas. En il focus stat la plazza da perscrutaziun Svizra cun sia irradiaziun internaziunala. «SCIENCEsuisse» è naschì sin iniziativa da la SRG SSR en collavuraziun cun il Fond naziunal svizzer. Ils 25 films curts, realisads da creaturas e creaturs da films, vegnan mussads a partir dals 26 d’october sin SF 1, a partir dals 10 da november sin TSI, a partir dals 16 da november sin TSR ed a partir dal prim da december 2008 sin HD suisse. Il film rumantsch sur dal geolog grischun Adrian Pfiffner «l'architectura da la terra» mussa TvR dumengia, l'emprim da favrer 2009 las 17.25 sin SF1. Per l’entschatta da las emissiuns vegn edida da la chasa editura Lars Müller ina publicaziun stampada en quatter linguas, cun bleras illustraziuns inclusivamain duas DVD cun tut ils films curts.

«SCIENCEsuisse» duess dar ina invista al public cun tge che scienzadas e scienzads s’occupan a l’entschatta dal 21avel tschientaner. La tscherna dals 25 projects na vul betg esser represchentativa, ella vul plitost far resortir quellas perscrutadras e quels perscrutaders ch’èn vegnids enconuschents cun lur lavur sur ils cunfins dal pajais ora. Sco las retschas predecessuras «PHOTOsuisse», «DESIGNsuisse» ed «ArchitecTour de Suisse» metta era questa nova retscha da televisiun da la SRG SSR l’accent sin las fermezzas da la Svizra.

«SCIENCEsuisse» metta pais sin ina concepziun attractiva dals films sco era da preschentar ils cuntegns cumplexs, per part schizunt ordvart cumplitgads, uschia ch’els èn chapaivels e tuttina exacts. Quai è per las creaturas ed ils creaturs dals films, sco era per las perscrutadras ed ils perscrutaders ina gronda sfida. En ils films curts vegnan las perscrutadras ed ils perscrutaders bler a pled. Quai dat ina gronda vischinanza al public e permetta ina confruntaziun intensiva cun il sectur da perscrutaziun tractà. Ils texts en il cudesch èn redigids da schurnalists spezialisads en la scienza. Il fotograf Andri Pol, enconuschent per ses sguards surprendents sin il mund, dat cun sias fotografias la tempra visuala a la publicaziun «SCIENCEsuisse».

Per l’entschatta d’emissiun ha oz lieu a Berna la premiera naziunala e la vernissascha dal cudesch. Armin Walpen, directur general da la SRG SSR, renviescha a la significaziun da la perscrutaziun scientifica: “Cun «SCIENCEsuisse» vulain nus avrir l’access a la scienza per la populaziun. Scienzadas e scienzads èn architects dal savair. Els ans gidan da sclerir ils misteris ils pli zuppads da nossa existenza. Perquai meritan els nossa confidenza e noss sustegn.”

Il Fond naziunal svizzer ha accumpagnà cun ses savair spezialisà l’entir project; il Secretariat da stadi per furmaziun e perscrutaziun procura per la diffusiun internaziunala da «SCIENCEsuisse» e www.swissinfo.ch ha procurà per la versiun englaisa dals films curts.

Communicaziun d'interpresa SRG SSR idée suisse

Ulteriuras infurmaziuns davart «SCIENCEsuisse» dat:
Bertilla Giossi, tel.: 079 304 63 40

www.sciencesuisse.sf.tv (Deutsch) 
www.sciencesuisse.tsr.ch (Français)
www.rtsi.ch/sciencesuisse (Italiano)
www.rtsi.ch/sciencesuisse (Rumantsch)
www.sciencesuisse.swissinfo.ch (English)

RSIRTRRTSSRFSWI