SRG SSR

  • DE
  • FR
  • IT
  • RM
  • EN
Mariano Tschuor nov directur da Radio e Televisiun Rumantscha (RTR)

Communicaziun da pressa

08.09.2008

Mariano Tschuor nov directur da Radio e Televisiun Rumantscha (RTR)

Il Cussegl regiunal da la Cuminanza Rumantscha Radio e Televisiun (CRR) ha elegì oz Mariano Tschuor sco directur da Radio e Televisiun Rumantscha (RTR). El daventa successur da Bernard Cathomas il matg 2009.

Il Directori da la CRR, sut il presidi da Duri Bezzola ed en preschientscha dal directur general da la SRG SSR idée suisse Armin Walpen, ha suttamess al Cussegl regiunal la proposta dad eleger Mariano Tschuor, l'actual manader da la Televisiun Rumantscha e schefredactur RTR, sco directur da Radio e Televisiun Rumantscha (RTR). L'elecziun è succedida en la seduta dal Cussegl regiunal CRR dals 8 da settember. La RTR a Cuira cun var 150 persunas engaschadas è ina da las unitads d'interpresa da la SRG SSR idée suisse; il directur è a medem temp commember da la direcziun generala da l'entira interpresa SRG SRR idée suisse cun sedia a Berna.

Mariano Tschuor, gia dapi 1982 collavuratur en diversas funcziuns tar la SRG SSR, enconuscha l’interpresa da funs ensi, en spezial er l’unitad d’interpresa Radio e Televisiun Rumantscha. Sia rait da relaziuns en ils secturs da la cultura, politica ed economia va lunsch sur la Rumantschia or. Grazia a la collavuraziun en numerusas gruppas da lavur e sco manader da divers projects regiunals e naziunals, ha el sa profilà sco enconuschider profund da la materia. Las experientschas rimnadas durant ils divers onns tar l’interpresa SRG SSR è la meglra premissa per il post dal directur RTR.

Suenter onns a la scola claustrala a Mustér ha Mariano Tschuor (*1958) terminà la scolaziun da teater e dramaturgia al «Theater Hof» en Baviera. La furmaziun schurnalistica ha el absolvì tar la SRG SSR, nua ch’el è stà redactur e moderatur tar il Radio Rumantsch, correspundent a Cuira per Schweizer Fernsehen SF. Plinavant ha el manà partiziuns en ils ressorts da “Land und Leute” e “Volkskultur” da SF. Dapi 2003 è Mariano Tschuor il manader da program da la Televisiun Rumantscha ed ha dapi 2006 supplementarmain la funcziun dal schefredactur RTR. Divers projects da teater ed en spezial per l’EXPO 02 e Grischun 2003 conferman ses interess e sia enconuschientscha profunda da las linguas e la cultura Grischuna e Svizra.

Mariano Tschuor è maridà ed ha trais uffants creschids.

Directori dal Cussegl regiunal CRR

Infurmaziuns supplementaras:
Duri Bezzola 081 861 16 22
Mariano Tschuor 081 255 74 30

RSIRTRRTSSRFSWI