SRG SSR

  • DE
  • FR
  • IT
  • RM
  • EN
La SRG SSR lantscha in gieu interactiv davart l’integraziun

Communicaziun da pressa

27.03.2008

La SRG SSR lantscha in gieu interactiv davart l’integraziun

S’avischinar al tema da l’immigraziun cun agid d’in gieu

Berna, ils 27 da mars 2008 – La SRG SSR idée suisse lantscha oz gievgia, ils 27 da mars 2008, diesch dis avant l’entschatta da l’emna tematica «wir anderen – nous autres – noi altri – nus auters», in gieu interactiv captivant cun il num «Nus auters – il gieu».

Il gieu «Nus auters – il gieu», ch’è disponibel a partir dals 27 da mars sin tut las paginas Web da las unitads d’interpresa da la SRG SSR, è vegnì sviluppà aposta sco contribuziun multimediala per l’emna tematica da la SRG SSR davart l’integraziun (5 – 13 d’avrigl 2008). Il giugader gioga en ina Svizra virtuala ed agescha d’ina vart sco interprendider e da l’autra vart sco minister da l’economia. Cun sias acziuns po el manar cun success ils otg secturs economics definids e contribuir uschia al svilup da ses pajais. Il gieu sa basa surtut sin las datas statisticas da l’onn 2007 da l’Uffizi federal da migraziun. Per render il gieu pli interessant ed augmentar il plaschair da giugar èn tschertas cundiziuns e cifras fixadas ordavant. Il gieu na pretenda perquai betg d’esser facticamain cumplet. Tuttina mussa el a moda impressiunanta quant interessant ed a medem temp difficil ch’igl è da contribuir al success economic d’in pajais, resguardond las pli diversas influenzas.

Da l’integraziun profitan tuts

Il gieu da la SRG SSR mussa a moda ludica ch’ils pajais industrials bainstants n’èn betg mo dependents da l’immigraziun da forzas da lavur spezialisadas, mabain ch’els profitan era da las lavurantas e dals lavurants main qualifitgads. Entant ch’ils pajais bainstants disponan da dapli chapital e tecnologia, han ils pajais pli paupers in pli grond potenzial da forzas da lavur. Sch’ils pajais ritgs permettessan damai a las estras ed als esters d’immigrar libramain, fiss quai per els tenor il pensar ricardian (tenor David Ricardo, il represchentant da l’economia naziunala classica) in cler avantatg. E quai betg mo, perquai ch’ils immigrants surpiglian per regla lavurs pajadas main bain, che na vegnan betg exequidas gugent dals indigens. Mabain era perquai ch’els prestan cun ils daners ch’els tramettan a chasa ina gronda contribuziun a l’agid en svilup.

Descripziun dal gieu «Nus auters»:
Crear in martgà da lavur equilibrà

Sco interprendider po il giugader plazzar las lavurantas ed ils lavurants disponibels sin il martgà da lavur a moda uschè ideala sco pussaivel en ils secturs economics. El po spustar il persunal d’in sectur a l’auter u relaschar las persunas tut tenor il svilup economic. El sto adina empruvar da reparter las persunas tenor lur abilitads e cuntanscher ina relaziun armonica tranter ils indigens ed ils immigrants. La finala po el era influenzar il nivel da las pajas en ils secturs economics e prender mesiras da motivaziun. Tut quests parameters han in’influenza directa sin il success u il nunsuccess pervi dals custs pli auts u da las fluctuaziuns.

Promover las mesiras d’integraziun

Sco minister da l’economia po il giugader promover en ils singuls secturs economics mesiras che megliereschan la chapientscha vicendaivla tranter las lavurantas ed ils lavurants activs en quests secturs. Quai èn surtut curs per promover las enconuschientschas linguisticas e mesiras per ina meglra chapientscha per la cultura.

Cura ch’il giugader ha prendì tut las decisiuns, terminescha el il mais virtual. Ils parameters vegnan elavurads ed il success economic dal pajais vegn calculà e preschentà da nov. En il proxim mais ha il giugader la pussaivladad da far adattaziuns u da reagir sin la nova situaziun al martgà da lavur. Il spazi da temp virtual maximal dal gieu è 10 onns.

La colliaziun directa al gieu dals singuls emetturs da radio e televisiun da la SRG SSR:

«Nus auters – il gieu»

«Wir anderen –das Spiel»

«Noi altri – il gioco»

«Nous autres – le jeu»

Illustraziuns: http://simmigration.sfgame.ch/IMG.zip

Daniel Steiner, pledader da medias da la SRG SSR idée suisse, 079 827 00 66

Contacts:

Emna tematica da la SRG SSR davart l’integraziun:

  • Mariano Tschuor, Manader da project naziunal da l’emna tematica da la SRG SSR, Tel. +41 (0)79 756 63 00

Idea dal gieu, svilup e programmaziun:

  • Severin Gehring, DISSENTER GmbH, Wildbachstrasse 3, 8400 Winterthur, Tel. +41 (0)52 202 01 85, www.dissenter.ch
  • Maurus Dosch, Radio e Televisiun Rumantscha RTR, Via da Masans 2, 7002 Cuira, Tel. +41 (0) 81 255 76 33, www.rtr.ch
RSIRTRRTSSRFSWI