La SRG SSR

Refurma da las structuras SRG SSR

Dapi che la refurma da las structuras è entrada en vigur il 1. da schaner 2010, ha la SSR ina direcziun strategica, unitara e dal tuttafatg operativa. La nova structura sa basa principalmain sin las suandantas ideas directivas:

Il directur general surpiglia – sco quai ch'igl è stà il cas gia fin ussa, da nov dentant a moda nundividida – la direcziun da l'entira interpresa; ils directurs dals emetturs da radio e da televisiun al èn suttamess. El na fa betg pli part da las suprastanzas regiunalas (antruras cussegls d'administraziun regiunals).
La SSR è francada en la societad grazia als purtaders da l'interpresa. Els controllan ed accumpognan l'activitad da la SSR, animeschan la debatta publica davart in service public confurm al temp ed els prendan influenza sin la qualitad dal program.
Ils cussegls regiunals (CR) e la radunanza da delegads (RD) obtegnan
→ infurmaziuns supplementaras: rapports davart la strategia e davart la realisaziun da la strategia (RD), davart la qualitad dal program (RD e CR) e davart concepts da program (CR)
→ dretgs supplementars: dumondas d'examinaziun da la RD al cussegl d'administraziun areguard la strategia ed areguard il service public, dumondas dals CR a la suprastanza regiunala areguard concepts da program.

Las suprastanzas regiunalas han in status ch'è cumparegliabel cun quel d'ina cumissiun dal cussegl d'administraziun. En il rom da las directivas naziunalas han ellas ils suandants dretgs da cundecider fatschentas definidas relevantas per il program:

decisiuns davart concepts da program inclus la repartiziun dals meds da program respectivs en il rom da las directivas naziunalas;
dumondas al cussegl d'administraziun da la SSR areguard l'elecziun dals directurs da las unitads d'interpresa e dal segund nivel da direcziun relevant per il program
dumondas areguard ils lieus da studio, areguard la divisiun u la fusiun dad unitads d'interpresa ed areguard l'organisaziun dal segund nivel da direcziun relevant per il program
dumondas areguard ulteriuras fatschentas attribuidas dal cussegl d'administraziun.

Ils presidents da las suprastanzas regiunalas fan vinavant part dal cussegl d'administraziun da la SSR. Quai è indispensabel per l'infurmaziun vicendaivla ed il process da furmaziun da la voluntad entaifer il cussegl d'administraziun.

L’elavuraziun da la refurma da las structuras

Il Cussegl federal ha pretendì a chaschun da sia decisiun davart la concessiun dals 26 da november 2007 che las structuras da la SSR vegnian examinadas. Ins stoppia verifitgar, sche quellas adempleschian las pretensiuns dad oz areguard la corporate governance e l'effizienza. Plinavant stoppian vegnir elavuradas propostas per realisar ina refurma da las structuras.

La concessiun (art. 23) prescriva ch'il cussegl d'administraziun stoppia garantir a l'autoritad da concessiun ch'i vegnian cuntanschidas las prestaziuns che la lescha prescriva e ch'el haja da s'occupar da la direcziun generala e da la surveglianza suprema da la SSR. Tenor l'art. 24 al. 4 da la concessiun na pon ultra da quai persunas che surpiglian funcziuns impurtantas entaifer la structura d'interpresa da la SSR betg pli esser elegiblas en il cussegl d'administraziun.

La SSR è – tenor la Lescha federala davart radio e televisiun dals 24 da mars 2006 – in'interpresa da dretg privat ch'è organisada tenor il dretg da la societad anonima (art. 31, al. 1, lit. f LRTV).

La refurma dal 1991, cun ils statuts dals 24 d’avrigl 1991 ch’èn stads en vigur enfin la fin dal 2009, ha dividì la direcziun generala da la SSR. En il rom da la politica generala da l'interpresa (normas, strategias, plans, attribuziun dals meds) definida dal cussegl d'administraziun da la SSR han las quatter societads regiunalas surpiglià la direcziun generala dals emetturs da radio e da televisiun en lur regiun.Vastas cumpetenzas sco p.ex. l'approvaziun dal budget u la nominaziun da persunas directivas per las unitads d'interpresa tutgavan tar las incumbensas dals cussegls d'administraziun regiunals. Ils directurs da las unitads d'interpresa eran suttamess dublamain: als cussegls d’administraziun regiunals ed al directur general. Il directur general da sia vart era commember dals cussegls d'administraziun regiunals. Quest sistem entretschà cun subordinaziuns dublas cuntrascheva a las exigenzas da la corporate governance che pretenda per l'ina ina direcziun ch'è responsabla per tut e per l'autra ina delegaziun graduada da las incumbensas.

Ils 26 da favrer 2008 ha il cussegl d'administraziun da la SSR lantschà in project per examinar las structuras. Benedikt Weibel, l'anteriur directur general da las Viafiers federalas svizras (VFF), è vegnì incumbensà sco expert per dumondas concepziunalas da manar ina gruppa da contact e d'evaluaziun (GCE) e d'inoltrar fin la stad dal 2008 ses rapport da valitaziun cun propostas da meglieraziun areguard la direcziun generala. L'Institut per la scienza publicistica e per la perscrutaziun da medias da l'Universitad da Turitg (IPMZ) ha surpiglià la rolla d'expert per examinar l'efficacitad dals purtaders da l'interpresa.

Quest rapport da la GCE è vegnì preschentà al cussegl d'administraziun che al ha suttamess per consultaziun a las societads regiunalas, a las societads commembras ed a la direcziun da la SSR la fin da zercladur 2008. Il rapport cumpigliava gia tut ils puncts essenzials da la refurma da las structuras ch’è vegnida concludida pli tard. La maioritad è da princip stada d’accord cun il rapport. Duas societads commembras da la Svizra tudestga (SRG Berna Friburg Vallais e la SRG Svizra Orientala) al han refusà per motivs federalistics ed han sustegnì vinavant in’autonomia regiunala en il rom d’ina coordinaziun naziunala. Per mauns da la radunanza da delegads ha il cussegl d’administraziun elavurà in rapport davart ils princips da la refurma a basa dal resultat da consultaziun. Quel ha surpiglià las propostas da la GCE e resguardà propostas da meglieraziun punctualas.

Ils 26 da november 2008 ha la radunanza da delegads approvà il rapport dal cussegl d'administraziun davart la refurma da las structuras cun 35 cunter 6 vuschs ed uschia preparà la via per la revisiun dals statuts. Il medem di ha era il Cussegl federal approvà ils princips areguard la revisiun dals statuts en il rapport a la radunanza da delegads e confermà ch'i vegnian ademplidas las pretensiuns da la concessiun.

Sa basond sin il rapport che la radunanza da delegads ha approvà, ha il cussegl d’administraziun da la SSR elavurà ils statuts novs. Ils 22 da december 2008 ha el consegnà quels a las societads regiunalas, a las societads commembras sco er a la direcziun da la SSR. Ils 24 d’avrigl 2009 èn ils statuts alura vegnids suttamess a la radunanza da delegads per la decisiun. Quella ha approvà la revisiun. Ils 17 da zercladur 2009 ha il Cussegl federal abrogà l’art 24 al. 4 da la concessiun che avess scumandà als presidents regiunals da far part al cussegl d’administraziun. Ils 12 d’avust 2009 ha il DATEC approvà ils novs statuts da la SSR ch’èn entrads en vigur il 1. da schaner 2010.

Silsuenter èn vegnidas exequidas lavurs da realisaziun tant da vart da l’interpresa sco era davart dals purtaders, uschia per exempel lavurs per introducir ils concepts da program per definir il rom d’expensas e per rinforzar la rolla en la societad civila.

Dieta dals gremis 2009