SRG SSR

Dieta naziunala 2016

Dieta naziunala 2016

Venderdi, ils 30 da settember 2016 ha gì lieu a Lugano en l'Auditorio Stelio Molo la dieta naziunala SRG SSR 2016 organisada da la Società cooperativa per la Radiotelevisione svizzera di lingua italiana (CORSI). Var 180 commembers da las quatter societads regiunalas da la SSR (SRG.R, SRG.D, CORSI e RTSR) han dà suatientscha a l'invitaziun en il Tessin. Ins ha discurrì davart il servetsch public audiovisual en l'Europa ed en Svizra, ils problems en connex cun quel e las sfidas per l'avegnir. Plinavant èn vegnidas fatgas propostas co che la lavur da las societads regiunalas pudess vegnir organisada a moda pli efficazia.

Oz vegn savens pretendì ch'il temp dal servetsch public saja passà. Malgrà ch'in grond dumber d'auditurs e d'aspectaturs en divers pajais, tranter auter er en Svizra, refutescha quai, è indispensabla ina debatta averta davart la rolla e l'identitad dal radio e la televisiun publica.

Ed exact quella occasiun ha purschì la dieta «Servetsch public – oz e damaun». Tut quels ch'èn participads a la discussiun èn pertutgads directamain da la tematica, saja quai Gilles Marchand, il directur RTS, che ha cumpareglià ils emetturs da radio e televisiun europeics, u Philipp Metzger, directur da l'Uffizi federal da communicaziun, che ha explitgà il rapport dal Cussegl federal. La dieta ha era promovì il dialog tranter la branscha da medias ed il mund da finanzas, demonstrà a moda exemplarica en il discurs tranter il directur general da la SSR Roger de Weck ed il CEO da la UBS Group AG Sergio Ermotti – in barat che para tant pli necessari en vista a la dira critica tranter auter da l'economia, ma era da la politica drizzada a la lavur mediala. Il pensum da metter en dumonda las posiziuns en la debatta dal suentermezdi davart il mund da medias svizzer ha surpiglià il schurnalist Robert Ruoff.

Cun ina contribuziun d'ina gruppa da students dals professers Gabriele Balbi e Massimo Scaglionida da la Facultad da la scienza da communicaziun a l'Universitad da la Svizra taliana USI han ins resguardà la generaziun futura da collavuraturs da medias. Lur ponderaziuns e conclusiuns vegnan integradas en in rapport che vegn a star a disposiziun proximamain sin la pagina-web www.corsi-rsi.ch.

Ils schurnalists Alessia Caldelari, Aldo Sofia ed Alessandra Zumthor han manà tras la dieta. Era la dumonda urgenta co che las societads regiunalas da la SSR exequeschian en il futur a moda efficazia lur rolla sco ancra per il servetsch public en la populaziun è vegnida tematisada. Luigi Pedrazzini, il president da CORSI, ha medemamain tractà quest tema. Il president SRG SSR Viktor Baumeler ha fatg in pled final.

Ulteriuras infurmaziuns e l'entir program chatt'ins sin la pagina-web www.corsi-rsi.ch.

RSIRTRRTSSRFSWI