Aktuelle Position
Cussegl d’administraziun
Al cussegl d’administraziun tutga la direcziun generala da la SSR. El maina las fatschentas ed ha la responsabladad envers l’autoritad da concessiun da procurar che vegnian cuntanschidas las prescripziuns da prestaziun fixadas en la lescha ed en il dretg da concessiun. Sa basond sin l’art. 716 a e b dal Dretg d’obligaziuns (DO) e sin ils statuts ha el – exceptà las cumpetenzas che na pon betg vegnir delegadas u retratgas ed ulteriuras cumpetenzas da decider resalvadas – delegà al directur general la direcziun da l’interpresa e la direcziun generala dals programs en il reglament d’organisaziun dals 16 da december 2009. Il reglament d’organisaziun è vegnì adattà ils 16 da december 2010 a la nova organisaziun da direcziun da la direcziun generala.
Il cussegl d’administraziun da la SSR sa cumpona da nov commembers:
- Ils quatter presidents da las societads regiunalas fan part dal cussegl d’administraziun ex officio.
- La radunanza da delegads elegia il president dal cussegl d’administraziun e dus ulteriurs commembers.
- Dus commembers dal cussegl d’administraziun vegnan nominads dal Cussegl federal.
Ils nov commembers dal cussegl d’administraziun appartegnan a la radunanza da delegads. Il cussegl d’administraziun sa constituescha sez. El elegia in u dus vicepresidents ed installescha ina cumissiun d’examinaziun (Audit Committee), ina cumissiun d’indemnisaziun, ina cumissiun da nominaziun, ina cumissiun d’investiziuns ed ina cumissiun Swissinfo. Il cussegl d’administraziun nominescha in secretari central che n’è betg commember dal cussegl d’administraziun. La revisiun interna gida il cussegl d’administraziun e la cumissiun d’examinaziun ad ademplir sias obligaziuns da surveglianza e controlla. Il directur general prenda per regla part a las sedutas dal cussegl d’administraziun.
La legislatura currenta dal cussegl d’administraziun va a fin il 2015.
Cooperaziun cussegl d’administraziun cun cussegls regiunals
En il rom da las prescripziuns strategicas da la purschida dal cussegl d’administraziun fixeschan las suprastanzas regiunalas ils concepts da program. Tenor la mesira da quests concepts repartan ellas ils meds da program (rom d’expensas) attribuids dal cussegl d’administraziun sin las chadainas u sin ils champs da program. Ellas fan propostas al cussegl d’administraziun davart las suandantas fatschentas relevantas per il program:
- elecziun dals directurs da las unitads d’interpresa,
- elecziun da las forzas directivas dal segund nivel da direcziun cun responsabladad relevanta per il program,
- midada dals lieus da studio regiunals,
- midada da la structura regiunala en unitads d’interpresa,
- midada dal segund nivel da direcziun da las unitads d’interpresa relevant per il program.
Sch’il cussegl d’administraziun n’accepta betg las propostas, las renviescha el cun pretensiuns a la suprastanza regiunala. Divergescha la suprastanza regiunala da las pretensiuns dal cussegl d’administraziun en connex cun ils concepts da program u cun la repartiziun da meds colliada, decida il cussegl d’administraziun. Dal rest pon las suprastanzas regiunalas far propostas al cussegl d’administraziun davart la qualitad ed il service public da las unitads d’interpresa.
Foto
da sanester a dretg: Raymond Loretan, Viktor Baumeler, Lucy Küng, Regula Fecker, Jean-François Roth, Luigi Pedrazzini, Oscar Knapp, Hans Lauri, Ulrich Gygi, Willi Burkhalter
