Aktuelle Position
Resultat da gestiun 2011
Cun sia politica da finanzas vul la SRG SSR cuntanscher relaziuns finanzialas stabilas ed uschia mantegnair sia independenza. In resultat equilibrà furma la basa. L'onn da gestiun 2011 è questa finamira vegnida cuntanschida; en la sedia principala han ins realisà in gudogn da gestiun da 25,8 miu. francs.
Questa differenza po vegnir attribuida a differents effects. Per l'ina han ins pudì augmentar las entradas da las taxas da recepziun en cumparaziun cun l'onn precedent per 6,2 miu. francs, cunquai ch'il dumber da pajataxas privats e commerzials è creschì. Per l'autra han ins pudì schliar limitaziuns betg pli necessarias che muntan a 17,9 miu. francs cun spustar la Billag SA sin il quint annual. Il martgà da reclamas ch'è puspè daventà pli ferm registrescha en cumparaziun cun l'onn precedent in augment da 14,4 miu. francs.
L'onn 2011 n'han gì lieu ni campiunadis mundials da disciplinas da sport popularas ni in'olimpiada, quai che ha gì in effect positiv sin ils custs. Plinavant èn vegnids remess 120 collavuraturas dal sectur producziun e tecnica a nossa filiala TPC. Quests dus process han sminuì las expensas da persunal per 23,7 miu. francs e las ulteriuras expensas da gestiun per 10,3 miu. francs. Plinavant han las sinergias entaifer la sedia principala e la terminaziun da projects da fusiun e d'effizienza distgargià las ulteriuras expensas per 8,3 miu. francs.
Da l'autra vart èn s'augmentadas las expensas per il program e la producziun per la summa marcanta da 31,7 miu. francs. Quai primarmain pervi dals custs da producziun pli chars e l'augment d'atgnas producziuns da 19,9 pertschient sin 21,6 pertschient dal volumen d'emissiun. La decisiun da dischlocar la sedia da Basilea en in lieu pli central ha gì per consequenza amortisaziuns nunspetgadas da 16,5 miu. francs. Il resultat finanzial è sa revegnì cun la reducziun da la perdita sin ils curs ed è sa meglierà per 7,8 miu. francs.
L'onn proxim resta la SSR fidaivla a sia politica e prenda puspè en mira in resultat equilibrà. Las perspectivas per l'onn 2012 èn empermettentas per la SSR, betg l'ultim pervi da las occurrenzas grondas da sport.
