Aktuelle Position
La SSR dal 1931 fin oz
Emprim pult per emetter a Losanna (dal1922 fin il 1923). Foto: GD ZAR
Il 1922 ha cumenzà a Losanna il terz emettur da radio public en l'Europa a lavurar. En ils onns 1920 vegnan fundadas en tut la Svizra societads da radio. L'onn 1923 èn vegnidas prendidas 980 concessiuns da radio. Fin il 1926 pon ins tadlar radio mo cun uregliers.
Il 1930 vegnan prendidas pliras decisiuns impurtantas davart la politica da radio naziunala. Il radio duai esser organisà a moda federalistica e betg vegnir surlaschà a las forzas da la fiera.
Fundaziun da la SRG SSR (1931) en il casino a Berna. Da sinestra a dretga: Arnold Rothenberger, Hermann Gwalter, Maurice Rambert, Charles Baud, Hans Zickendraht, Hans Lauterburg, Roger Olivet, Francesco Borella, Alois Muri, Max Ritter.
Il 1931 vegn fundada la Societad svizra da radio (SSR). Ella unescha tut las organisaziuns da radio regiunalas sut in tetg. L'emprim directur general da la SSR ha num Maurice Rambert. La centrala da la SSR ha pauc da dir, i domineschan las societads da commembers.
La SSR survegn dal Cussegl federal la suletta concessiun per emissiuns da radio en Svizra. Novitads dastga la SSR retrair mo da l'Agentura telegrafica svizra (ATS). 150 000 concessiuns da radio èn vegnidas prendidas.
Maurice Rambert, l'emprim directur general da la SRG SSR (fin il 1936).
En ils onns 1930 cumenzan ils emprims emetturs naziunals da lingua tudestga, franzosa e taliana a lavurar: Sottens il mars 1931, Beromünster il matg 1931 e Monte Ceneri l'october 1933.
Alfred W. Glogg, directur general da la SRG SSR fin il 1950.
Il 1936 daventa Alfred W. Glogg directur general da la SSR.
L'onn 1937 va la nova concessiun da la SSR en vigur. L'emprima reorganisaziun maina ad ina centralisaziun pli ferma da la SSR.
Il 1938 vegn acceptà il rumantsch dals votants svizzers sco quarta lingua naziunala. Il studio da radio a Turitg emetta pli e pli savens contribuziuns en rumantsch.
Il 1939 A l'exposiziun naziunala preshenta la Scola politecnica federala da Turitg per l'emprima giada en Svizra la nova tecnica da televisiun. La SSR engascha ina gruppa d'acturs che gioga ina scena davant la camera. Quella vegn transmessa sin il monitur da l'apparat da televisiun.
Studio da radio a Berna, guardia militara durant la Segunda Guerra mundiala entum il 1940. Foto: GD ZAR
Dal 1939 fin il 1945 En la Segunda Guerra mundiala surpiglia Schweizer Radio ina funcziun politica impurtanta. La SSR sustegna cun ses programs la «Defensiun spirtala» dal pajais cun tematisar la Svizra sco naziun da cultura variada fundada sin la voluntad politica. Sias emissiuns davart la situaziun politica e militara na vegnan betg mo udidas en Svizra, mabain - sur undas curtas - en tut il mund. Ils emetturs naziunals vegnan stimads sco vusch neutrala. 590 000 concessiuns da radio èn vegnidas prendidas.
A partir dal 1943 vegnan emessas regularmain emissiuns rumantschas, adina l'emprim venderdi dal mais.
Radio Suisse Romande a la partenza dal Tour de Suisse, il 1939. Foto: GD ZAR
L'onn 1949 èn vegnidas prendidas en Svizra in milliun. concessiuns da radio.
Marcel Bezençon, directur general da la SRG SSR fin il 1972.
Il 1950 vegn Marcel Bezençon elegì sco directur general da la SSR.
Ina dunna cun in radio a transister, il 1951.
En ils onns 1950 sa fa plaunsieu valair il radio a transister: tadlar radio daventa ina chaussa quotidiana ch'ins po far independentamain dal lieu. Ins po recepir adina dapli programs esters ed indigens. Ils radios da la SSR introduceschan ils segunds programs. L'èra da la televisiun cumenza er en Svizra cun emissiuns d'emprova a Losanna, Basilea e Turitg.
L'onn 1952 surpiglia la SSR da la PTT il radiotelefon.
Transmissiun da sport en ils onns 1950. Foto: GD ZAR
Il 1953 introducescha la SSR in program da televisiun d'emprova uffiziala: tschintg sairas l'emna emetta il studio Bellerive a Turitg in program da var in'ura. 1,2 miu. concessiuns da radio e 920 concessiuns da televisiun èn vegnidas prendidas.
Signet da l'Eurovision.
L'onn 1954 fundeschan otg staziuns da televisiun europeicas - cun ina collavuraziun considerabla da la SSR - l'Eurovision, l'organisaziun per il barat internaziunal da programs.
Il 1957 conceda il Cussegl federal a la SSR ina concessiun da televisiun. Ella va en vigur il 1. da schaner 1958.
Cameras en preparaziun per la transmissiun da la festa da narcissas a Montreux (emprima transmissiun da l'Eurovision), 1954.
Il 1958 lantscha la SSR definitivamain in program da televisiun cun emissiuns tudestgas resp. franzosas davent da Turitg e Genevra. Ils emetturs tessinais transmettan ils programs cun commentaris talians. 1,3 miu. concessiuns da radio e 50 000 concessiuns da televisiun èn vegnidas prendidas.
Il 1960 vegn midà il num da "Societad svizra da radio" en "Societad svizra da radio e televisiun". L'abreviaziun SSR resta.
Il 1961 survegn il Tessin in studio da televisiun provosoric.
Studio da televisiun avant il 1965.
L'onn 1963 vegn transmessa l'emprima emissiun da televisiun rumantscha.
Registraziuns da televisiun a la cursa dal Lauberhorn, l'onn 1964. Foto: GD ZAR.
Il 1964 survegn la SSR dal Cussegl federal ina nova concessiun, per l'emprima giada per radio e televisiun ensemen. La SSR s'organisescha da nov ed adatta ses statuts.
Il Cussegl federal conceda l'introducziun da la telereclama. L'emprim spot da televisiun vegn emess il 1. da favrer 1965. Pretsch per minuta: 6000 francs. La SA per la telereclama vegn fundada.
Reschia da maletg e da tun en il center da televisiun en la Chasa federala.
Il 1965 vegn inaugurà il studio da radio e televisiun en la Chasa federala.
Mat davant apparats da radio e da televisiun. Foto: GD ZAR
Il 1966 vegn installà per las emissiuns rumantschas a Cuira in agen post da program. Sias emissiuns vegnan transmessas sur il segund program da Schweizer Radio DRS.
I vegn fixà ch'ils segunds programs duain satisfar als «basegns superiurs areguard la musica, il divertiment e l'infurmaziun».
Moderaturas en l'emissiun d'avertura da la televisiun svizra da colur, l'onn 1968.
L'onn 1968 crescha en in temp politicamain agità il dumber da concessiunaris da televisiun a moda considerabla. Il december vegn prendida la milliunaria concessiun da televisiun. Tar il radio èn vegnidas prendidas 1,8 miu. concessiuns.
La SSR introducescha uffizialmain la televisiun da colur e la perscrutaziun sistematica dals basegns dal public da radio e televisiun.
Emprima tschentada sin la glina, il moderatur Bruno Stanek cun in model da l'Apollo, l'onn 1969.
1969 La damaun marvegl dals 21 da fanadur guardan en Svizra var in miu. persunas la transmissiun da televisiun en directa da l'emprima tschentada sin la glina.
Il studio il pli grond al Leutschenbach.
En ils onns 1970 vegnan prendids en funcziun ils novs studios da Turitg, Genevra e Comano.
Il 1971 va a fin l'èra da las novitads da radio producidas da l'Agentura telegrafica svizra (ATS) a fin suenter passa quaranta onns. Uss è la SSR responsabla suletta per las emissiuns d'infurmaziun. Radio svizzera di lingua italiana retira enfin la fin dal 1975 vinavant sias novitads da l'Agentura telegrafica svizra.
Stelio Molo, directur general da la SRG SSR fin il 1981.
L'onn 1972 daventa Stelio Moro directur general. A partir da quest onn vegn augmentada cuntinuadamain la preschientscha d'emissiuns da televisiun rumantschas en il program dal Schweizer Fernsehen DRS.
Il 1975 vegn creà il ressort Televisiun Rumantscha.
1978 25 onns suenter l'emprima emissiun da televisiun dals 20 da fanadur 1953 è creschì il dumber da concessiuns da televisiun sin 1,9 miu. A partir da quest onn vegnan emess programs da radio adina pli savens en stereo.
Leo Schürmann, directur general da la SRG SSR fin il 1987.
Il 1981 daventa Leo Schürmann directur general da la SSR. 2,3 miu. concessiuns da radio e 2 miu. concessiuns da televisiun èn vegnidas prendidas.
L'onn 1983 liberalisescha il Cussegl federal la lescha davart las medias: radios locals privats e commerzials èn lubids. La SSR introducescha la terza chadaina da programs per in public giuven: DRS 3 en Svizra tudestga, Couleur 3 en Suisse romande e Rete 3 en la Svizzera italiana.
Gestiun d'emprova Teletext, il 1981.
A partir dal 1984 emetta Teletext en Schweizer Fernsehen DRS, il 1985 en la Télévision Suisse Romande, e l'onn 1986 er en la Televisione svizzera di lingua italiana. SSR, ZDF ed ORF lantschan il program da televisiun cuminaivel sur satellit, 3sat.
Surdada d'uffizi da Schürmann a Riva.
L'onn 1987 daventa Antonio Riva directur general da la SSR.
Il 1990 vegn sviluppà a Genevra il World Wide Web. L'onn 1993 nascha l'internet sco med nov en il senn dad oz. El è naschì la mesadad dals onns 1960 sco med da l'armada americana.
Il 1991 fa la SSR ina refurma da structura extendida. L'interpresa s'organisescha sco corporaziun d'uniuns privata e sa structurescha sco ina holding da dretg d'aczias. L'onn che suonda van ils statuts novs en vigur, la refurma da structura è terminada.
L'onn 1992 va en vigur la nova lescha federala da radio e televisiun. L'incumbensa culturala da la SSR vegn fixada en la lescha ed en la concessiun da la SSR. Entaifer la reorganisaziun da la SSR daventa il Radio Rumantsch ina unitad d'interpresa independenta.
Schweiz – Suisse – Svizzera – Svizra 4.
Il 1993 cumenza ad emetter la quarta chadaina da televisiun designada S Plus, a partir dal 1995 sco emettur naziunal cun il num Schweiz - Suisse - Svizzera - Svizra 4.
Il 1994 cumenza il quart program Radio Suisse Romande ad emetter: Option Musique, «La chaîne de la chanson».
Il 1995 vegn la Televisiun Rumantscha independenta da Schweizer Fernsehen DRS. L'unitad d'interpresa per las emissiuns rumantschas cumpiglia ussa radio e televisiun: Radio e Televisiun Rumantscha.
Armin Walpen, il directur general da la SRG SSR idée suisse.
Il 1996 daventa Armin Walpen directur general da la SSR. Schweizer Radio DRS lantscha sco offerta supplementara a l'emprim program - la Musigwälle 531, in emettur che porta surtut musica populara e musica da divertiment.
L'onn 1997 vegn repartida la segunda chadaina sin ils segunds programs SF zwei, TSR 2 e TSI 2. Il radiotelefon sistescha sias emissiuns e vegn remplazzà d'in program da satellit.
Virus – la generaziun da radio la pli nova.
Il 1999 survegn la SSR il nov num SRG SSR idée suisse. «Idée suisse» na stat betg vinavant mo per singuls programs d'impuls, mabain daventa la marca da qualitad dal service public da la SRG SSR.
La SRG SSR idée suisse cumenza a digitalisar il radio (Digital Audio Broadcasting, DAB). La fasa da cumplettaziun entschaiva cun la Svizra tudestga e romanda. Fin il 2009 duai esser provedida tut la Svizra.
SF DRS introducescha en collavuraziun cun Presse TV il chanal da repetiziun per emissiuns d'infurmaziun SFinfo sco program d'emprova en la regiun da Turitg.
Radio Svizzer Internaziunal installescha cun www.swissinfo.org ina plattafurma d'internet che pussibilitescha da recepir en tut il mund ils programs da la SRG SSR ed infurmaziuns davart la Svizra.
Virus, il radio per giuvenils da Schweizer Radio DRS, entschaiva ad emetter. Igl è l'emprim radio dal tuttafatg digital da la Svizra.
La fin dal 2000 èn vegnidas prendidas en Svizra per l'emprima giada tantas concessiuns da radio sco concessiuns da televisiun: 2,7 milliuns.
La residenza da Swissinfo/SRI a Berna.
Il 2001 permetta ina midada da concessiun d'emetter en tut la Svizra il program da repetiziun SFinfo.
Radio Svizzer Internaziunal sa mida ad ina interpresa da multimedia, cumplettescha sia plattafurma multimediala www.swissinfo.org e cumenza a reducir las emissiuns ad undas curtas. Radio Svizzer Internaziunal sa preschenta cun il num da ses product: Swissinfo.
Monolith a l'expo.02 cun il bastiment idée suisse.
Il 2002 s'engascha la SRG SSR idée suisse per l'expo.02. En tut ses set programs da televisiun, en 14 da ses 18 programs da radio e sin sias paginas d'internet è l'exposiziun naziunala in tema.
L'onn 2003 cumenza la SRG SSR idée suisse a digitalisar la derasaziun da la televisiun senza fil terrestra (Digital Video Broadcasting. DVB-T). Entschaiver entschaivan l’Engiadina ed il Tessin. L’entira Svizra duai esser digitalisada l’onn 2008.
Il 2004 smetta Swissinfo/Radio Svizzer Internaziunal (RSI) da derasar sias emissiuns da radio sur undas curtas e satellit. Infurmaziuns davant la Svizra emetta ella mo pli sur la plattafurma d’internet www.swissinfo.org.
Il 2005 mida il program da musica da DRS Musigwälle 531, ch’emetta musica tradiziunala da tut las spartas ses num. Il sa cloma ussa DRS Musigwälle e vegn cumplettà da las rubricas d’infurmaziun da DRS 1 las pli impurtantas.
Schweizer Fernsehen DRS vegn rebattegiada e sa numna ussa Schweizer Fernsehen (SF).
2006 festivescha la SRG SSR idée suisse ses giubileum da 75 onns (24 da favrer).
L'onn 2007 van la nova lescha da radio e televisiun (LRTV) e l’ordinaziun nova (ORTV) en vigur (1. d’avrigl). Las midadas las pli grondas èn il splitting da las taxas (1 pertschient da las taxas da recepziun survegnan las staziuns da radio e televisiun privatas), l’obligaziun da derasar emissiuns da televisiun adattadas als basegns da persunas cun impediments (cun suttittels, lingua da segns ed ina descripziun auditiva), il scumond da far reclama e sponsoring en il sectur online.
Davent dal november vegnan emess tant DRS 4 News sco era World Radio Switzerland (WRS) ed ils 3 da december vegn latschà HD suisse, in dals emprims emetturs da service public da l’Europa en il standard da la televisiun ad auta resoluziun.
77 onns suenter si'inauguraziun vegn l'emettur ad undas mesaunas "Beromünster" mess or da funcziun.
2008
La midada da la televisiun via l'antenna analoga a la digitala vegn terminada cun success. Dapi il favrer recepeschan las aspectaturas ed ils aspectaturs ils programs da televisiun da la SRG SSR via antenna exclusivamain a moda digitala.
Sco possessura uffiziala dals dretgs per l'UEFA EURO 2008TM rapporta la SRG SSR en directa da tut ils 31 gieus da la pli gronda occurrenza da sport che ha ina giada gì lieu en Svizra.
77 onns suenter si'inauguraziun vegn l'emettur ad undas mesaunas «Beromünster» mess or da funcziun.
2009: La radunanza da delegads da la SRG SSR idée suisse approvescha ils statuts revedids da la SRG SSR. Uschia stat la SRG SSR a partir dal 2010 sut la direcziun strategica unitara dal cussegl d'administraziun da la SRG SSR e sut la gestiun operativa permanenta dal directur general.
L’emettur naziunal da Sottens
Entaifer in territori linguistic è sa furmada il 2010 da la fusiun da Radio Suisse Romande (RSR) e da Télévision Suisse Romande (TSR) la nova unitad d’interpresa Radio Télévision Suisse (RTS).
79 onns suenter si'inauguraziun vegn l’emettur naziunal da Sottens mess or da funcziun.Plirs millis visitaders han undrà quels dis l’emettur a chaschun dals dis da las portas avertas.
Ils 31 da schaner 2012 a mesanotg terminescha l'emettur d'emprova da la SSR HD suisse sia transmissiun.
La SSR emetta da nov sis dals set programs da televisiun regulars (danor SF info) en in'excellenta qualitad da high-definition. Radio Télévision Suisse (RTS) lantscha la plattafurma online rts.ch e reorganisescha sia cumparsa d'interpresa. TSR e RSR vegnan remplazzads dad RTS.
Il radio digital DAB+ (Digital Audio Broadcasting) è fitg stimà en Svizra: il fanadur han ins vendì il milliunavel apparat. Uschia cuntanscha il radio digital 2,4 milliuns audituras ed auditurs. Bunamain in terz da las chasadas svizras taidla en il fratemp radio en moda digitala.
Il Cussegl federal insista sin il scumond da far reclama online per la SSR. La SSR duai dentant survegnir dapli libertad areguard ils cuntegns da las purschidas online.
