SRG SSR

Cronica 2015

Cronica 2015

10 da schaner, SwissAwards
A Turitg vegn surdà en il rom d'ina gala per la 13avla giada il «SwissAward» a persunalitads da las categorias politica, economia, cultura, show e societad. Didier Burkhalter vegn elegì sco «Svizzer da l'onn» 2014, Udo Jürgens vegn undrà posthum cun il «Lifetime Award» per si'ovra da la vita.

12 da schaner, RTS Info en continu
RTS lantschescha «RTS Info en continu», in stream da novitads or d'emissiuns principalas dals secturs infurmaziun e sport da radio, televisiun e multimedia. «RTS Info en continu» è accessibel sur internet, smartphone e tablet.

19 da schaner, nov studio da RTR
Cler, avert e modern: uschia sa preschenta il nov studio da televisiun da RTR. El ademplescha autas pretensiuns, tant tecnicamain sco graficamain.

22-29 da schaner, Dis da film da Soloturn
Per la 50avla giada vegnan realisads la quarta emna da schaner ils Dis da film da Soloturn. Tuts dus premis principals – il «Prix de Soleure» ed il «Prix du public» – vegnan attribuids a films ch'èn vegnids coproducids da la SSR en il rom dal Pacte de l’audiovisuel: «Spartiates» da Nicolas Wadimoff ed «Usfahrt Oerlike» da Paul Riniker.

2 da favrer, nova pagina-web rtr.ch
La pagina-web rtr.ch da Radio Televisiun Rumantscha traglischa en in nov vestgì. Ella tegna quint dals basegns modifitgads dal public, metta il focus sin novitads regiunalas e porscha surtut cuntegns multimedials.

5 da favrer, ballarait d'emprima qualitad live en il web
La SSR e Swiss Volley lantscheschan ensemen in nov project online. Per l'emprima giada po il public persequitar live ils gieus decisivs da la liga la pli auta. En il web-stream da SRF, RTS e RSI pon ins guardar e tadlar las scuntradas cun in commentari en la lingua naziunala respectiva.

8 da favrer, emettur da radio da l'onn Couleur 3
Couleur 3 vegn undrà al «Salon de la radio» a Paris. Il program da radio da RTS survegn il premi da l'onn sco emettur da radio franzos da dretg public.

9 da mars, Tour de Suisse
Il Tour de Suisse vegn ins a pudair guardar er ils proxims quatter onns sin ils chanals da la SSR. La SSR e l'agentura da mediatisaziun InfrontRingier ch'è nov responsabla per il tur, èn sa cunvegnidas da collavurar.

13 da mars, Premi dal film svizzer
En preschientscha dal cusseglier federal Alain Berset vegnan surdads per la 18avla giada ils Premis dal film svizzer. La documentaziun fictiva «Der Kreis» survegn quatter premis. Dals victurs da la saira fa part er «Electroboy». Sabine Timoteo e Sven Schelker dastgan prender encunter ina trofea «Quartz» sco megliers acturs. La surdada dals premis ha lieu en il Bâtiment des Forces Motrices a Genevra e vegn transmessa da SRF, RTS e RSI via live-stream e sustegnida da la SSR.

21-28 da mars, Festival International du Film de Fribourg
«González» da Christian Díaz Pardo gudogna il grond premi da Regard d’or a la fin da la 29avla ediziun dal festival dal film da Friburg (FIFF), che carmala passa 40 000 aspectaturs. La SSR è partenaria da medias dal FIFF che porscha ina plattafurma ad auturs, producents e distributurs che cumbattan ina unificaziun dal kino.

26 da mars, la SSR construescha ina plattafurma IT basada sin ina cloud
La SSR renovescha l'infrastructura tecnica per la producziun da medias digitala. Sco partenaria d'acquisiziun vegn la Swisscom a stgaffir ed a far ir fin 2019 pass per pass ina plattafurma IT basada sin in nivel informatic.

1. d'avrigl, cifras nairas
La SSR cuntanscha 2014 in surpli da 4,8 milliuns francs. Il resultat positiv vegn obtegnì grazia ad ina planisaziun finanziala stricta – malgrà ils gronds custs da producziun e persunal per plirs gronds eveniments da sport.

14 d'avrigl, la televisiun che sa drizza tenor l'aspectatur
Swisscom connectescha HbbTV  – il successur multimedial dal teletext cun bleras funcziuns interessantas. HbbTV è accessibel tranter auter sin ils programs d'auta definiziun da la SSR.

17-25 d'avrigl, Visions du Réel
Per la 46avla giada ha lieu a Nyon il festival dal film «Visions du Réel». Il premi principal survegn il reschissur da film iracais Abbas Fahdel per «Homeland». La coproducziun da RTS «Une jeunesse allemande» survegn il Prix SSA/Suissimage. La SSR sustegna il festival per films documentars dapi blers onns. 

5 da matg, di naziunal da collecta per Nepal
La Chadaina da Fortuna rimna 1 milliuns francs per las victimas dal terratrembel desastrus en Nepal ch'ha chaschuna ils 25 d'avrigl plirs milli morts e blessads. La Chadaina da Fortuna è vegnida fundada 1946 sin iniziativa da la SSR. 

12 da matg, elecziuns naziunalas interactiv
En vista a las elecziuns naziunalas lantschescha la SSR ina app da quiz, la «Politbox». Ils utilisaders pon sa mesirar cun differentas dumondas davart la politica e la societad svizra. Ina redacziun naziunala da tschintg persunas tgira la redacziun da la app e sviluppa er vinavant il cuntegn. 

15–17 da matg, Dis da litteratura da Soloturn
La SSR sustegna ils Dis da litteratura da Soloturn per la 8avla giada cun in partenadi da medias.  

22 da matg, Grüezi Schweiz – Bonjour la Suisse – Destinazione Svizzera
Quatter pajais, quatter famiglias. Lur derivanza è fitg differenta, lur finamira dentant identica: ina vita ed in futur en Svizra. La SSR ha accumpagnà las famiglias sin lur via en la nova patria e mussa lur istorgias a la televisiun en la seria da tschintg parts «Grüezi Schweiz – Bonjour la Suisse – Destinazione Svizzera» sin SRF 1, RTS Un e RSI LA 2. 

22 da matg, Eurovision Song Contest
La Genevrina Mélanie René manchenta cun ses titel «Time to Shine» il final da 60avel «Eurovision Song Contest» a Vienna. La victoria va en Svezia grazia a Måns Zelmerlöw cun «Heroes». La Svizra è in commember da fundaziun dal «Concours Eurovision de la Chanson», sco che l'emissiun vegniva numnada antruras. 

28 da matg, il president sa retira
Raymond Loretan sa retira sco president e cusseglier d'administraziun da la SSR per la fin da l'onn. Il presidi da la SSR surpiglia ad interim il vicepresident Viktor Baumeler. 

14 da zercladur, gea a la revisiun da la LRTV
Il pievel svizzer approva en votaziun la nova lescha da radio e televisiun (LRTV). En l'avegnir duain il radio e la televisiun vegnir finanziads d'ina taxa independenta d'in apparat.

3–11 da fanadur, NIFFF
La SSR sustegna il festival internaziunal da films fantastics a Neuschatel (NIFFF). Il program dal festival da films fantastics e d'orrur cumpiglia var 130 films da 30 pajais.

14 da fanadur, il mitus Matterhorn
Ils programs da la SSR regordan a la primascensiun dal Matterhorn avant 150 onns – cun pliras emissiuns davart ed enturn la muntogna mistica.

1. d'avust, nov concept per la festa naziunala
«Lueget vo Berg und Tal – Par monts et par vaux – Per monti e valli – Per culms e vals». Moderaturs da tut las quatter parts dal pajais viagian en crusch ed a travers tras la Svizra e rapportan da cuntradas e tradiziuns singularas.  Sin la Älggi-Alp, il center geografic da la Svizra, sa chattan els lura per festivar ensemen la festa dal 1. d'avust.

5–15 d'avust, festival da film a Locarno
Per la 68avla giada sa mida la Piazza Grande a Locarno en ina sala da kino sut tschiel avert. Il leopard d'aur va al reschissur da la Corea dal sid Hong Sang Soo per ses film «Right Now, Wrong Then». La SSR sa participescha al festival en il rom d'in partenadi general.

10 da fanadur, Eusi Landchuchi – Cuisine de chez nous – Cucina nostrana
Per l'emprima giada lantscheschan SRF, RTS e RSI communablamain ina concurrenza da cuschinar: cuschiniers e cuschinieras per hobi da la Svizra tudestga cun ragischs ruralas chattan Cuisiniers da la Svizra franzosa u Cuochi tessinais. Gudagnà en l'emprima gruppa ha Frédéric Blum da Rougemont.

17 d'avust, cooperaziun da SSR,  Ringier e Swisscom
Ringier, SSR e Swisscom concentreschan la commerzialisaziun da lur purschidas medialas e plattafurmas da reclama en ina nova firma cuminaivla. Admeira sa drizza vers ils basegns da clients da reclama e medias svizras che sa midan fermamain. Ils servetschs da l'interpresa èn accessibels a tut ils empustaders da reclama, las agenturas ed auters offriders da l'inventari da reclama.

1–6 da settember, Fantoche
A Baden ha lieu il 13avel festival internaziunal per film d'animaziun Fantoche. Il festival fa part da las scuntradas mundialas extraordinarias per films d'animaziun ed è la show da films da dissegns animads la pli gronda en Svizra. La SSR sa participescha al festival en il rom d'in partenadi da medias.

5–6 da settember, Schubertiade
Festival da musica classica cun in'atmosfera da festa populara: La Schubertiade da Espace 2 vegn per sia 19avla ediziun en la citad bilingua Bienna e pussibilitescha cun quai da dar in'egliada sur l'uschenumnà foss da la rösti musical. Programs da la SSR emettan live in puschel multifar da musica  – dal solo al clavazzin sur il chant e la musica da chombra fin al chor e l'orchester. 

7 da settember, mesiras da spargn massivas
Suenter l'emprim program da spargn da 20 milliuns francs 2015 pervi d'entradas regressivas da reclama spargna la SSR a partir da 2016 ulteriurs 40 milliuns. Per las mesiras da spargn datti dus motivs: las entradas da la taglia sin la plivalur crodan davent e la part da las taxas a favur dals emetturs locals e regiunals daventa pli gronda. 

11 da settember, premi svizzer da musica
Il Grand Prix svizzer da musica va a l'oboist, cumponist e dirigent da musica classica Heinz Holliger. La SSR è partenaria dal premi svizzer da musica che vegn organisà 2015 per la segunda giada.

15 da settember, di naziunal da collecta per la Siria
La Chadaina da Fortuna rimna en in di 5,7 milliuns francs a favur dals fugitivs e las unfrendas dal conflict en Siria. La Chadaina da Fortuna è vegnida fundada 1946 sin iniziativa da la SSR.

24 da settember – 4 d'october, festival da film a Turitg
Il 11avel festival da film a Turitg mussa en indesch dis 161 films – da quels 14 premieras. L'egl d'aur per il meglier film dramatic internaziunal gudogna «Hrútar» dal reschissur da l'Islanda Grímur Hákonarson. Il premi dal public va a «Amateur Teens» da Niklaus Hilber, ina coproducziun da la SSR.

28 da settember, dieta naziunala SSR
La quarta dieta naziunala da la SSR vegn organisada da la societad regiunala SSR Svizra Rumantscha ed ha lieu a Cuira. Il tema da la dieta è la contribuziun da la SSR a la democrazia.

6 d'october, reducziun da plazzas
En consequenza da la sentenzia dal Tribunal federal areguard la taglia sin la plivalur e pervi da la part da las taxas pli gronda per emetturs regiunals sto la SSR spargnar a partir da 2016 mintg'onn 40 milliuns francs. L'interpresa quinta cun la reducziun da var 250 plazzas da lavur.

7–11 d'october, Shnit
La SSR sustegna il festival internaziunal da films curts Shnit gia per la terza giada. Shnit vul esser ina plattafurma internaziunala per cineasts, scenarists, producents e persunas intgantadas dal film ed ha lieu mintg'onn sin tschintg continents a medem temp.

21 d'october, custs d'emissiun
La SSR stgaffescha dapli transparenza. Sco emprim emettur da la SSR publitgescha SRF ina glista extendida dals custs da las emissiuns da televisiun.

28 d'october 2015, festival da films per emprender
En il forum dal Kornhaus a Berna ha lieu la quarta ediziun dal festival da films per emprender. Las contribuziuns che vegnan mussadas en quell'occasiun han tuttas l'intenziun da scolar. Er quest onn sustegna la SSR il festival da films per emprender organisà da Lernetz sco project senza finamira da profit.

3–8 da november, dis dal film curt a Winterthur
Ils dis dal film curt a Winterthur, sustegnids da la SSR dapi onns, han lieu per la 19avla giada. Ils dis dal film curt èn cun 15 000 visitaders il festival da film da quel gener il pli impurtant da la Svizra. 

6–14 da november, Festival Tous Ecrans

Kino, televisiun, telefonin u internet: la 21avla ediziun dal festival da film Tous Ecrans a Genevra è ina festa dal maletg animà e da la varietad.

8 da november, animalic e bun
Nua è l'animal en tai? Quella dumonda sa fa la nova seria-web «bipeds» da RTS. En il center èn trais giuvens creschids che vegnan observads e filmads en lur spazi da viver – tenor las reglas dal film documentar d'animals. Ins po guardar la seria-web da set parts sin las paginas-web da las unitads d'interpresa RSI, RTR, RTS e SRF.

27 da november, Baumeler nov president da la SSR
La radunanza da delegads da la SSR elegia Viktor Baumeler fin tut il pli 2017 sco president da la SSR e conferma las duas commembras dal cussegl d'administraziun Lucy Küng und Regula Bührer Fecker per la perioda d'uffizi 2016–2019.

2 da december, posiziunà nov il Teletext
Il teletext da Radio Televisiun Svizra (SRF), Radiotelevisione svizzera (RSI) e Radio Télévision Suisse (RTS) focussescha sin cuntegns publicistics e survegn ina nova structura da las paginas. Las rubricas novitads, sport, meteo, program da tv, bursa e traffic survegnan dapli plazza per infurmaziuns.

10–16 december, Jeder Rappen zählt

Per la settavla giada organiseschan SRF e la Chadaina da Fortuna l'acziun da donaziuns «Jeder Rappen zählt». RTS e RSI sa participeschan cun dis d'acziun. Ils 4’109'635 francs rimnads vegnan mess a disposiziun a projects per giuvenils en basegn en Svizra ed a l'exteriur.

12 da december, Credit Suisse Sports Awards
Stan Wavrinka, Daniela Ryf e Marcel Hug èn ils victurs dals «Credit Suisse Sports Awards 2015». Dapi 1997 organisescha Credit Suisse, ensemen cun l'uniun da schurnalists da sport svizzers e la SSR in'occurrenza da gala che vegn emessa directamain.

 

 

RSIRTRRTSSRFSWI