1. da sciane
Raymond Loretan entra en uffizi sco nov president da la SRG SSR. Il biling da 56 onns è tranter auter stà secretari general da la PCD, ambassadur svizzer a Singapur e consul general en la posiziun d'ambassadur a New York.

14 da sciane
En il rom d'ina sairada da gala a Turitg vegnan surdads per la dieschavla giada ils SwissAwards. Il skiunz Didier Cuche daventa il «Svizzer da l'onn 2011».

20 da sciane
La SSR suttascriva il Pacte de l'audiovisuel 2012 – 2015. En questa cunvegna cun las pli impurtantas uniuns da producents da films garantescha la SSR il sustegn dal kino independent cun in budget annual da 22,3 milliuns francs e resta uschia la pli impurtanta coproducenta dal pajais.

19 fin 26 da sciane
Per la 47avla giada han lieu durant la quarta emna da schaner ils Dis da film da Soloturn. La SSR sustegna l'occurrenza dapi blers onns.

31 da sciane
Ils 31 da schaner 2012 a mesanotg terminescha l'emettur d'emprova da la SSR HD suisse sia transmissiun. HD suisse è vegnì lantschà il december 2007 sco in dals emprims emetturs da televisiun gratuits en l'Europa cun maletgs en qualitad da HD.

28 da favrer
La SSR emetta da nov sis dals set programs da televisiun regulars (danor SF info) en in'excellenta qualitad da high-definition. Simultanamain introducescha ella ina nova regulaziun dal volumen per il tun da televisiun.

28 da favrer
Radio Télévision Suisse (RTS) lantscha la plattafurma online rts.ch e reorganisescha  sia cumparsa d'interpresa. TSR e RSR vegnan remplazzads dad RTS, quai che dat novs nums per ils chanals da televisiun: «RTS Un» ed «RTS Deux». Ils chanals da radio restan senza midaments, vegnan però colliads cun il logo dad RTS.

15 da mars
La SSR venda sia immobiglia a la Giacomettistrasse 1 a Berna a la societad d'assicuranzas da vita Mobigliar SA. La SSR resta però er en l'avegnir la locataria da l'edifizi.

17 da mars
Il Premi dal film svizzer «Quartz 2012», che vegn surdà en nov differentas categorias a cineastas e cineasts svizzers, vegn festivà per la quarta giada en il Center da cultura e congress a Lucerna en il rom d'ina sairada da gala organisada da la SSR.

20 fin 27 d'avrigl
Per la 18avla giada ha lieu a Nyon il festival da film «Visions du Réel». La SSR sustegna il festival per films documentars dapi blers onns.

24 d'avrigl
La SSR sa segirescha ad uras ils dretgs exclusivs da televisiun, radio, internet e transmissiun per ils campiunadis mundials da ballape 2018 en Russia e 2022 en Katar.

3 da matg
La SSR scriva suenter tschintg onns puspè cifras nairas. Ella ha cuntanschì l'onn 2011 in surpli da 25,75 milliuns francs cun ina svieuta da bunamain 1,6 milliardas francs.

18 fin 20 da matg
La SSR sustegna ils Dis da litteratura da Soloturn per la tschintgavla giada cun in partenadi da medias.

23 da matg
A Baku ha lieu per la 57avla giada il final dal «Eurovision Song Contest» senza participaziun svizra: «Sinplus», ils victurs da la show da decisiun naziunala, vegnan eliminads gia en il semifinal. La Svizra è commembra fundatura dal «Concours Eurovision de la Chanson». Uschia aveva num l'emissiun cura ch'ella è vegnida fundada.

29 da matg
Ringier finescha la producziun da sias atgnas emissiuns per la Presse TV AG per motivs d'economia da manaschi.

13 da zercladur
Il directur general da la SSR Roger de Weck ed ils deputads da set associaziuns d'interess da persunas cun senns impedids suttascrivan la cunvegna da prestaziun per ils onns 2012 fin 2017. Las novaziuns empermettan ina clera meglieraziun da las prestaziuns per persunas cun senns impedids.

19 da zercladur
La retscha da televisiun «CINEMAsuisse» undrescha diesch cineastas e cineasts che han influenzà il kino indigen cun lur talent spezial. Las emissiuns pon ins guardar sin SRF, RTS, RSI ed RTR.

8 da zercladur fin 1. da fanadur
La SSR rapporta detagliadamain davart la UEFA EURO 2012TM en Pologna ed en l'Ucraina en ses programs da radio e televisiun, era sche la squadra naziunala svizra n'è betg vegnida da sa qualifitgar. Il program cumpiglia emissiuns directas, giasts interessants, discussiuns captivantas, rapports cumplessivs ed infurmaziuns actualas davart ils teams.

10 da fanadur
La SSR e la Swiss Ice Hockey Federation (SIHF) prolungheschan lur partenadi da contract per tschintg ulteriuras stagiuns fin il 2016/17. La nova cunvegna permetta a la SSR d'emetter en directa gieus da tut las rundas dals Playoffs.

27 da fanadur fin 12 d'avust
La SSR rapporta mintga di fin 12 uras davart ils gieus olimpics da stad a Londra sin tut ils vecturs da lur programs da radio e televisiun. En il focus da las reportaschas stattan sper ils highlights olimpics surtut las qualificaziuns e decisiuns impurtantas dals sportists svizzers.

31 da fanadur
Il radio digital DAB+ (Digital Audio Broadcasting) è fitg stimà en Svizra: il fanadur han ins vendì il milliunavel apparat. Uschia cuntanscha il radio digital 2,4 milliuns audituras ed auditurs. Bunamain in terz da las chasadas svizras taidla en il fratemp radio en moda digitala.

1. fin 11 d'avust
En il decurs da sia istorgia da 65 onns ha il Festival internaziunal dal film cuntanschì ina posiziun centrala en il mund dals gronds inscunters da films. Mintg'onn s'inscuntran a Locarno durant l'avust passa 160 000 amaturs dal film, 3000 represchentants da la branscha e 900 persunas da las medias. La SSR sa participescha al festival en il rom d'in partenadi cumplessiv.

23 d'avust
Referentas e referents da vaglia discurran davart visiuns per la situaziun dal radio svizzer e mussan pussaivladads per il svilup da questa scena. Il premi «Radio of the Year 2012» survegnan il Radio 105 a Turitg per la svizra tudestga ed il World Radio Switzerland (WRS) per la svizra latina.

29 d'avust
La SSR e Weltklasse Zürich prolungheschan il contract davart la producziun ed ils dretgs d'utilisaziun mediala per radio, televisiun ed internet dal «Leichtathletik-Meeting Weltklasse Zürich/Diamond League» fin l'onn 2016.

14 da settember
Il Cussegl federal insista sin il scumond da far reclama online per la SSR. La SSR duai dentant survegnir dapli libertad areguard ils cuntegns da las purschidas online.

17 da settember
La SSR e l'Uniun da ballape europeica UEFA sa cunvegnan davart la prolungaziun da las transmissiuns da la «UEFA Champions League» e la «UEFA Europa League» sin SRF, RTS, RSI ed RTR (televisiun, radio ed online/mobil) fin il 2014/2015.

22 da settember
La SSR ed il sindicat da las medias «Schweizer Syndikat Medienschaffender» sa cunvegnan suenter set rundas da tractativas sin in nov contract da lavur collectiv (CLC) 2013. Il nov CLC vala a partir dal 1. da schaner 2013 per quatter onns.

4 d'october
Chasper Stupan, il directur da Radiotelevisiun Svizra Rumantscha (RTR) dals onns 1984 fin 2001, mora en la vegliadetgna da 71 onns. Durant sia direcziun ha RTR realisà l'emprima chadaina d'emettur UUC per il Radio Rumantsch (RR). Questa chadaina ha extendì il program da radio da duas uras e mez sin 13 uras il di e digitalisà la producziun da radio.

15 d'october
La SSR ha revedì sia strategia d'interpresa. Per l'emprima giada ha ella integrà sia strategia da program en la strategia d'interpresa. Sper las finamiras colliadas cun l'economia da manaschi menziuna la SSR per l'emprima giada er activitads per in ulteriur svilup da la purschida al radio, en la televisiun ed en l'internet.

1. fin 8 da november
Kino, televisiun, telefon mobil u internet: la 18avla ediziun dal festival da films «Cinéma Tous Ecrans» è ina festa dal maletg animà e da la varietad cun passa 80 films realisads en las pli diversas modas. La SSR sustegna il festival dapi blers onns.

6 fin 11 da november
Ils Dis dals films curts a Winterthur, che la SSR sustegna dapi onns, han lieu quest onn per la 16avla giada. Il festival da films curts è cun ses var 15 000 visitaders il pli impurtant festival da films svizzer en quest stil.

28 da november
La SSR ed il Club da Hockey da Tavau (HCD) prolungheschan lur partenadi enturn il Spengler-Cub per tschintg onns fin il 2016. La cunvegna garantescha la producziun da tut las partidas en auta definiziun tant per ils programs da televisiun da la SSR, SRF, RTS ed RSI sco era per il signal mundial.

15 da december
La SSR tschertga ensemen cun RTS ed RSI ils participants svizzers per il «Eurovision Song Contest» 2013 en Svezia. Il public svizzer ha votà al telefon per la Heilsarmee cun sia chanzun «You and me».

16 da december
Suenter l'uniun tematica e structurala da Schweizer Radio und Fernsehen (SSR) sa mussa la convergenza mediala era formalmain: a partir dals 16 da december 2012 sa preschenta tut la purschida da maniera clera sut il tetg da la SSR. En quest connex datti cun srf.ch er ina nova cumparsa online.

16 da december
Nicola Spirig e Roger Federer èn ils gronds victurs dals Credit Suisse Sports Awards 2012. Dapi il 1997 organisescha la Credit Suisse ensemen cun l'Uniun dals schurnalists da sport svizzers e la SSR in'occurrenza da gala emessa live ch'è s'etablida sco il pli impurtant eveniment da sport social da l'entir pajais.

17. bis 22. Dezember
Il project da collecta «Mintga rap quinta» vegn realisà per la quarta giada da Schweizer Radio und Fernsehen en collavuraziun cun la Chadaina da fortuna. Ils raps vegnan rimnads per il tema: «Aua: mintga gut gida!» Ils programs da radio da RTS Option Musique e La Première èn sa participads ils 19 da december cun in di d'acziun.

Cudesch «Radio e televisiun en Svizra»