Aktuelle Position
Surveglianza davart radio e televisiun
La surveglianza dal program vegn fatga l'emprim dals posts da mediaziun dals organisaturs. Tgi che n'è betg d'accord cun la decisiun dal post da mediaziun po sa drizzar a l'Instanza da recurs independenta per radio e televisiun (IRI). L'instanza da recurs publitgescha sias decisiuns. Cunter quellas pon ins recurrer al Tribunal federal. La SSR appartegna da nov er a la fundaziun Cussegl svizzer da la pressa. Il cussegl da fundaziun da l’organ da controlla da la pressa svizra ha approvà ils 5 da zercladur 2008 il schlargiament da l'uniun purtadra. Cun far part dal cussegl da fundaziun renconuscha la SSR il Cussegl svizzer da la pressa sco organisaziun d’autoregulaziun per la part redacziunala da las medias, sco era il codex etic-professiunal da la «Decleraziun da las obligaziuns e dals dretgs da las schurnalistas e dals schurnalists».
L'Uffizi federal da communicaziun (UFCOM) ha la surveglianza administrativa e finanziala dals organisaturs da radiodiffusiun. La surveglianza finanziala da la SSR ha il Departement federal per ambient, traffic, energia e communicaziun (DATEC). En la pratica giogan las proceduras da surveglianza en ils secturs da la reclama e dal sponsoring la pli gronda rolla. L'uffizi federal publitgescha sias decisiuns. Cunter quellas pon ins recurrer al Tribunal administrativ federal e silsuenter per regla al Tribunal federal.
