La SSR vul reunir publicisticamain e redacziunalmain il radio e la televisiun cun la finamira da meglierar la diversitad, la qualitad e la productivitad da las purschidas multimedialas, sco era d'augmentar l'accessibladad temporala, locala e tematica per in public uschè vast sco pussaivel. Perquai ha ella lantschà il project «Convergenza da las medias ed effizienza».

La convergenza da las medias è per la SSR ina necessitad, sch'ella vul concurrenzar sin il martgà, pertge ch'ella vegn influenzada da las suandantas forzas:

• politica (concessiun)
• concurrenza dals emetturs esters
• situaziun finanziala critica da l'interpresa
• midadas en l'utilisaziun da las medias, en il schurnalissem ed en la tecnologia

Midadas en l'utilisaziun da las medias: Pli baud tadlava l'entira famiglia da mezdi las novitads al radio. Oz taidla e guarda mintgin emissiuns durant uras differentas, en in lieu different e sur in vectur different (radio, televisiun, telefonin, internet, iPod). La SSR sto perquai metter a disposiziun ina purschida multimediala.

Midadas en il schurnalissem: La tecnologia pussibilitescha volumens d'infurmaziun e temps da publicaziun illimitads. Oz po mintgin chargiar da tut temp in film u in text en l'internet. I na dat nagina fin da redacziun pli. L'explosiun da purschidas nuncontrollablas e las investiziuns en il management da las novitads èn enormas. L'uman ha però il basegn d'orientaziun. Quai è ina gronda schanza per il service public. La SSR ademplescha la funcziun d'ina tur da signal publicistica.

Midadas tecnologicas: Ils apparats èn universals. Cun il telefonin pon ins telefonar, tadlar radio, guardar televisiun, trametter sms, etc. Pli baud sa differenziava la lavur d'in schurnalist da radio e d'in schurnalist da televisiun enormamain. Oz è ella fitg sumeglianta, perquai che las tecnologias da producziun èn las medemas. Sin il computer pon ins adattar maletgs e tuns. Ultra da quai èn las vias da transmissiun dal maletg e dal tun daventadas bler pli spertas (digitalisaziun).

In project da tetg sin duas pitgas

Il project «Convergenza da las medias ed effizienza» vegn dirigì sin plaun naziunal e consista da dus projects parzials:

• Il project parzial «Convergenza da las medias» cumpiglia ils trais projects da convergenza regiunals en Svizra tudestga, franzosa e taliana. Quels concernan ils products publicistics ed ils process principals, sco era l'organisaziun da quels. En plirs champs fai senn da promover la collavuraziun tranter las redacziuns (votaziuns, furmaziun, sport, scienza, musica, etc.). Qua vai per garantir per tut pretsch la diversitad e l'independenza en il schurnalissem.
• Il project parzial naziunal «Optimaziun dals process da support» ha la finamira d'optimar las funcziuns da support ord vista economica.

Dapli...