Charta da la purschida SSR

Preambel

Il public e l'engaschament per la coesiun naziunala stattan en il center da noss agir. Nus ademplin nossa incumbensa tenor las directivas francadas en la Constituziun federala, en la lescha ed en la concessiun SRG SSR. Al radio, a la televisiun ed en il sectur digital ans orientain nus en nossa lavur a normas communablas che reflecteschan las valurs dal service public. La Charta da la purschida definescha noss rom etic e qualitativ. Ella vala per tut ils cuntegns ed è lianta per tut las collavuraturas e tut ils collavuraturs da la SRG SSR, sco era tar la surdada d’incumbensas a terzs. RSI, RTR, RTS, SRF e SWI cumpletteschan la Charta da la purschida cun atgnas directivas per la lavur pratica.

Charta da la purschida SSR

Nossa purschida sa drizza a tut ils umans en Svizra ed a las Svizras ed als Svizzers a l'exteriur – independentamain da lur schlattaina, da la vegliadetgna, da la derivanza, da la religiun, da l’orientaziun sexuala, d’impediments e da models da viver. Nus tgirain il dialog cun la populaziun e cun las represchentantas ed ils represchentants da la societad civila, da la politica, da la cultura, da l'economia e dal sport.

Nus procurain che nossa purschida e noss material d'archiv vegnian derasads sin vias ch'èn adattadas per nossas differentas gruppas en mira. Nus elavurain noss cuntegns da maniera ch'els èn accessibels e chapibels per tuttas e tuts. En quel grà resguardain nus ils basegns dals umans cun senns restrenschids. 

Nus mussain la diversitad culturala, sociala, geografica e politica da la Svizra. Nossa purschida è ina gronda paletta da cuntegns da tut ils geners e formats e dat tant sco pussaivel spazi a tut las opiniuns e realitads. Sias pitgas principalas èn l'infurmaziun, la cultura, il divertiment ed il sport. Ultra da quai contribuin nus a la furmaziun ed a la savida. Nus ans occupain da basegns divers e laschain vegnir a pled las pli differentas gruppas – quai che reguarda per exempel la vegliadetgna, il gender, la situaziun da furmaziun, las relaziuns socioeconomicas e l'origin cultural – da la populaziun. Attenziun speziala deditgain nus a minoritads, umans giuvens, umans cun ina biografia da migraziun ed umans cun senns restrenschids. Nus dain paisa ad ina represchentaziun equilibrada dad umens e dunnas. Nossa purschida sa distingua da las purschidas commerzialas. Nus mettain l'accent sin cuntegns che nus producin sezs. Grazia a nossa enragischaziun regiunala purschain nus in'invista en ils tratgs cuminaivels sco er en las particularitads regiunalas. Uschia facilitain nus la chapientscha tranter las parts dal pajais, las regiuns, las culturas e las cuminanzas e nus rinforzain la coesiun. Plinavant sustegna nossa collavuraziun interregiunala il barat da purschidas e projects naziunals. Ed ultra da quai promovain nus il barat cun las Svizras ed ils Svizzers a l'exteriur e l'integraziun da las conburgaisas e dals conburgais da l'ester. 

Nus essan conscients dals effects che noss cuntegns pon avair sin noss public. Nus orientain noss cuntegns e la moda e maniera da preschentar quels sapientivamain tenor la finamira da mussar la realitad a moda objectiva, neutrala ed equilibrada. Nus enconuschain nossas obligaziuns eticas e giuridicas e respectain quellas.

En nossa lavur inscuntrain nus tut ils umans cun ina tenuta averta ed adina cun stima da l'integritad persunala – tenor basegn criticamain, ma adina cun respect. Nus mantegnain la sfera privata, nun ch'il bainstar public saja pli impurtant, e nus respectain las reglas vertentas da nossa professiun. Umans che basegnan protecziun protegin nus da maniera adattada; surtut als uffants deditgain nus attenziun speziala en quest connex. Nus desistin da tut ils pregiudizis, duvrain ina lingua imparziala che correspunda al gender e renunziain a stereotips.

Nus prendain decisiuns schurnalisticas ch'èn libras d'influenzas da la politica, da l'economia e d'autras gruppas d'interess. Nus n'ans suttamettain a nagins sforzs. Nus decidain independentamain d'interess u da preferenzas persunalas. Nus n'ans laschain betg corrumper.

Nus chattain agens access a temas e decidain sezs tge temas che nus vulain tractar, senza als laschar dictar d'insatgi.

En la massa d'infurmaziuns dain nus paisa a la credibladad da nossa purschida. Nus retschertgain l'infurmaziun, la controllain, la mettain a lieu e la valitain. En cas da basegn la commentain e la curregin nus. Retschertgar bain ils fatgs è pli impurtant che da derasar quels il pli spert pussaivel. Nus derasain unicamain infurmaziuns da funtaunas fidadas u las controllain cun premura avant che las publitgar.

Nus ans stentain d'eruir tut ils fatgs relevants per chapir per tge ch’i va. Nus na cultivain nagin schurnalissem da tesas tendenzius, noss schurnalissem è objectiv. Nus purschain in spazi avert per ina debatta infurmada. Nus declerain nossas intenziuns da maniera transparenta.

Commentaris rendain nus vesaivels sco tals. Nus refusain mintga furma da manipulaziun u da sfalsificaziun da la vardad cun agid da maletgs, tuns e texts. Infurmaziuns falladas curregin nus immediat ed en ina furma adattada.

Ils temas che vegnan tractads da nus duain porscher respostas a dumondas universalas. La relevanza d'in tema dependa surtut da sia actualitad ed impurtanza per la politica, l'economia, la cultura e la societad. 

La proximitad al public, tant geografic, emoziunal sco era cultural, è medemamain in aspect impurtant. 

La creativitad è il motor da noss agir. Nus promovain la transfurmaziun digitala e l'innovaziun. Nus sustegnain la prontezza da ristgar ed emprendain da las experientschas. Nus ans mettain en dumonda cuntinuadamain, empruvain novas furmas da raquintar e nizzegiain a moda activa las schanzas dals svilups tecnics. Nus resguardain il cumportament da la generaziun giuvna en connex cun il diever da las medias. Nus avain cumplaina confidenza en noss talents giuvens ed als surdain responsabladad.

Nus ans obligain da manar l'interpresa a moda persistenta e reducin ils effects negativs da nossa lavur sin l'ambient uschè fermamain sco pussaivel. Nus nizzegiain noss budget da maniera conscienziusa ed effizienta cun promover modas da producziun innovativas.

Nossa finamira è da crear in ferm liom tranter la Svizra dad ier e la Svizra da damaun cun represchentar la Svizra dad oz e ses svilup cuntinuant.